Google News - Top Stories

Healthy
Stories
Life-Style
COPY CODE SNIPPET

More News

*My Past* Sehemu ya 29.

*My Past*
Sehemu ya 29.
Bella alizidi kumchanganya Elvin. “Tafadhali Elvin.” “Itakuaje Bella? Hebu
niambie.” “Huyo muuguzi wake atakuwa akija hapa akimuhudumia mpaka muda wake wakuondoka ukifika, anamuacha hapa penye uangalizi mzuri, Vin. Masha akiwaona wanae wapo na afya njema, na akiona hivyo wewe unavyomuhangaikia Ric, atapona na kutuacha kwa amani akijua watoto wake wapo kwenye uangalizi mzuri, kwako. Nakuomba Vin. Mimi mwenyewe ndio nitawakuza hawa watoto, kwa pesa nitakazozitafuta kwa jasho langu mwenyewe. Sihitaji penzi wala pesa za Masha. Nataka uzima wake kwa ajili ya watoto wake tu.” “Ndio maana unanitia wasiwasi Bella. Hunihesabu mimi kabisa kwenye maisha yako. Unaweza kumuwazia Masha lakini sio mimi!?” “Jamani Vin! Sijui natakiwa nifanyaje. Nipo hapa kwa ajili yako!” “Mbona hunihesabu kwenye maisha yako?” “Nashindwa kuanza kukupa mizigo usiyostahili Vin? Naanzaje kukwambia uwatunze watoto wasio wako?” “Kama unajua mimi nitakuwepo kwenye maisha yako, na ninajua unawatoto, kwa nini usinihusishe katika kuwatunza?” “Nitajuaje kama unataka kuwa sehemu ya hayo majukumu, Vin? Katika yote tuliyopitia mimi na wewe, sijui kama bado una mawazo yaleyale ya zamani?” “Yapi?” Bella alinyamaza kidogo.

“Unakumbuka uliniambia ulikuwa unataka kunioa kipindi kile? Sasa sijui baada ya kuishi tena na Masha, na kuzaa naye mtoto mwingine, kama bado nina sifa za kuwa mkeo, Vin! Naogopa hata kukuuliza kwa hofu ya jibu la hapana.” “Na baada ya wewe kurudi, na kukufanyia yote niliyokufanyia nikiwa na Happiness, kama ningekuomba uwe mke wangu, je ungekubali?” Bella alikaa chini akiwaza.

Mwishowe Elvin naye alikaa. “Kwa nini tusipeane muda wa kufikiria Vin?” “Haukuwa hivyo Bella? Masha ameshatuingilia sana. Hunioni mimi tena kwenye maisha yako.” Bella alianza kulia. Ukisema hivyo unakosea Vin. Nipo hapa kwa ajili yako. Isingekuwa wewe ningeshaondoka. Siwezi kurudiana kimapenzi tena na Masha. Nataka wewe ufikirie Vin. Masha ndio ameongezeka kwenye maisha yetu, mimi na wewe. Tena na watoto wake. Hao wote watatu, mimi siwezi kuwaepuka hata iweje. Nipende nisipende wapo kwenye maisha yangu. ‘They are my past, which will follow me to the grave.’ Ila wewe unayo nafasi yakujitoa Vin. Nakupa tiketi isiyo na lawama. Hata leo ukiniambia hutaweza tena, nitakuelewa Vin. Watoto wawili wasio wako, sio kitu kidogo. Mimi si msichana tena, ni mama. Sitaki uje ujute baadaye au hawa watu wangu watatu, wakatuharibia mahusiano yetu. Nataka siku utakayosema ‘ndiyo’ uwe umeamua kwelikweli, kuwa ni mimi na wewe mpaka kifo na past yangu itakuwepo tu, hakuna jinsi ya kubadilisha.” Elvin alinyamaza. Bella alisimama nakutaka kutoka, kisha akarudi. “Naomba tumsaidie Masha. Naomba aje akae hapa kwa muda mpaka atakapopona. Akipona ataondoka. Tafadhali Vin.” Elvin alibaki akimwangalia Bella. “Tafadhali Vin.” “Hisia za mapenzi zitakaporudi kwa Masha?” “Haziwezi kurudi, kwa kuwa hazikuwahi kuwepo.” “Bella!?” “Mungu wangu ni shahidi Elvin. Nakiri nilikosea kurudi kuzaa na Masha, lakini kwa kuwa nilikukatia tamaa. Ulinitupa, akabaki Masha kama faraja na kimbilio langu. Alikuwepo pale wakati namuhitaji. Usiku na mchana, bila kuchoka wala kukata tamaa japo nilishamwambia nakupenda wewe. Nilikusubiri Vin mpaka nikakata tamaa, hasa pale mkeo aliponiambia mnatafuta mtoto mwingine, tena baada ya….” Bella aliinama na kulia zaidi.

“Nisikilize Bella. Wakati ule nilikuwa natafuta kufanya kwa upande wangu ili ikishindikana mimi nisiwe na lawama. Happiness alipojua umerudi, alianza fujo na kuanza kukulaumu kwa ajili ya matatizo yetu wenyewe pale nyumbani. Kutaka kumnyamazisha na asiendelee kukusema vibaya kwa watu, aliposema kama kweli wewe siye anayenifanya nipende kuja huku nyumbani, basi tuzae mtoto mwingine, nikakubali nikijua labda atatulia. Lakini haikuwahi kusaidia kitu. Na yeye akatumia yale maneno makusudi kukuumiza. Siku ile ulipomtamkia pale nje unaumia ukiniona naye, ndipo alipozidisha mateso kwako. Alikuwa akikuumiza wewe makusudi, tena mbele yangu ili kutaka kunisikia nitakachoongea ili akitumie kunihukumu. Happiness alikuwa akinitafutia sababu za kunitesa kama ulivyosikia habari nzima ya kisasi walichotaka kutulipiza.” “Pole Vin.” “Lakini hakuna kipindi kilichokuwa kigumu maishani mwangu kama kile. Na niliamua kukuacha kwa muda ili nirekebishe mambo ya nyumbani kwangu, kwa kuwa nilikuwa nikikuamini sana Bella. Nilijua jinsi ulivyomjasiri, nilijua ungesubiri mpaka….” “Mpaka lini Vin? Hapakuwa na tumaini tena. Na sikujua nasubiria nini? Hukuwa hata ukiongea na mimi.” “Hapo ndipo nilipokosea. Lakini wakati ule mambo mengi yalikuwa yakiendelea Bella. Sikuwa nikilala mchana wala usiku. Ugomvi hauishi. Kama sipo naye nyumbani basi atapiga simu na kuanza maneno. Sikuwa hata najua niongee nini na yeyote yule. Halafu nahisi na wivu wa Lewis nao ulichangia.” Bella alitabasamu huku anafuta machozi. “Eli huyo ndio alikutia wasiwasi. Lakini nilikuapia Vin. Hakuna kilichowahi kuendelea kati yangu na Lewis. Nakupenda wewe. Najua sasa hivi ni ngumu kuniamini tena, kwa yote niliyokufanyia lakin…” Elvin alimvuta Bella na kuanza kumbusu kwa mara ya kwanza tokea wafahamiane. Bella alipatwa na hisia zilizomchanganya asielewe ni nini. Alimkumbatia kwa nguvu Elvin na kubaki akitokwa na machozi. Elvin alimbusu Bella, kwa mapenzi makubwa sana. Hakuwa akielewa ni nini anafanya, lakini alitamani asimwachilie Bella. Aliendelea kumbusu huku amemshika na kuendelea kumpapasa taratibu huku mwili wake wote ukitetemeka. Tamaa ilikuwa imemuwaka sana, asijue na Bella naye alikuwa kwenye hali mbaya zaidi yake. Walitamani kama wangekuwa sehemu nyingine, peke yao, wamalize kila kitu.

“Fumanizi la Elvin na Bella.”
Mara walisikia mlango ukigongwa na kufunguliwa papo hapo. Elvin alishtuka sana, akabaki amepigwa na bumbuwazi. Alikuwa Mzee Mwasha amewasimamia. Aliwakuta kwenye hali ile, wakiwa wamekumbatiana kwa nguvu. Bella aliogopa sana, akabaki ameinama. “Samahan…, karibu baba.” Elvin alimwachia Bella. “Tunasubiri uamuzi wako Elvin. Tunataka kwenda kulala.” Mzee Mwasha alitoka. Elvin alimvuta tena Bella akambusu tena kidogo lakini Bella alijitoa kwa haraka. “Hapana Vin.” “Kwa nini?” “Baba..” “Baba amefanyaje?” “Sidhani kama ni sawa.” “Mimi kukubusu au hujafurahia jinsi nilivyokubusu?” Bella alicheka kwa aibu. “Sijawahi kupata hisia kama hizi wakati unanibusu Vin.” “Mbaya au nzuri?” Elvin alipitisha mikono yake kiunoni mwake, akamvutia kwake taratibu huku akimpa tabasamu, akimtizama Bella kwa penzi, kisha akaanza kumbusu tena. Bella alitulia na kubaki amemkumbatia Elvin huku na yeye akirudisha busu huku machozi yakimtoka. “Nakupenda sana Vin.” “Nakupenda Bella. Na wala sijawahi kuacha kukupenda.” Elvin alimwangalia vizuri Bella. “Masha akija hapa, utakuwa na ujasiri wa kumwambia kuwa unanipenda.” “Anafahamu jinsi ninavyokupenda Elvin.” “Kuanzia leo, nataka kila mtu ajue wewe ni wangu Bella. Hata Masha nataka aheshimu hilo.” Bella alifurahi sana. “Sitaki mtu yeyote akuguse tena Bella. Wewe ni wangu. Sawa?” “Nimefurahi Elvin. Asante.” “Haya twende tukaongee na baba na mama.” Elvin alitoka akiwa amemshika Bella mkono.

*************************************************************

Aliwakuta kaka zake na wazazi wake wamekaa kwenye kochi wakiwasubiri. “Mmeamuaje?” Mwasha alivunja ukimya baada ya kumuona Elvin anatafuta pakuanzia. “Tumesameheana na Bella, tumeamua kuanza upya.” “Hilo kila mtu anajua Elvin. Tunataka kujua mwafaka wa Masha.” Wote walicheka. “Baba bwana!” Eli alitania. “Kwani wewe baba ulijua nini? Maana mimi bado sijajua.” “Kwamba Elvin na Bella watasameheana?” Baba yake alimuuliza Eli. “Mimi nilikuwa sijui baba yangu.” “Huna lolote wewe Eli. Achana naye Mwasha, mume wangu. Hapo anataka tu, kumchokoza Bella. Hebu tuambieni hitimisho la Masha.” Bella alikuwa akichekacheka. “Kuanzia leo hakuna Bella peke yake ni mimi na yeye ndio tutamsaida Masha, tena hapahapa nyumbani. Akipona anaondoka.” Eli alianza kucheka. “Sasa unacheka nini, we Eli?” Bella aliuliza. “Naona ndoto zako zimetimia Bella.” Bella alicheka. “Nimefurahi sana. Vin amesema ananipenda.” Eno naye aliyekuwa anasinzia ilibidi acheke kwa sauti. “Nakuona mpaka swala la mgonjwa umesahau kabisaa.” “Hivi wewe Eli ukoje bwana? Kwa hiyo shida yako unataka Bella aanze kulia tena?” “Hapana mama. Nilikuwa nakumbuka vile alivyokuwa na wasiwasi na Masha. Gafla naona hana tena haraka yakumsaidia Masha na huzuni imekwisha!” “Sasa Vin si amesema nisiwe na wasiwasi!?” Wote walicheka.

“Ila nataka niwaambie, kumtoa pale Masha haitakuwa kazi rahisi. Mkewe hatakubali. Labda uwe unaenda kumuhudumia pale pale?” Baba yao aliongeza. “Nani aende? Bella? Hapana baba.” Elvin alishtuka sana. “Hapana kabisa. Bella hataenda pale.” “Nitakwenda kuongea na Mama Masha kesho.” Bella aliongeza. “Sawa kama utammudu. Sisi tunaenda kulala.” Mzee Mwasha na mkewe walisimama.

“Bellaaaa.” “Sitaki Eli.” Bella alimgeukia Elvin kimahaba huku akimumunya midomo yake na kumrembulia macho. “Unanisindikiza chumbani kwangu?” “Njoo kwanza huku chumbani kwangu.” Elvin alijibu. Mzee Mwasha alipowasikia, alisimama kabla hajaingia chumbani kwake. “Naona Bella akalale, halafu Elvin nakuomba huku chumbani kwetu.” Eli alikuwa amefika mlangoni akitaka kutoka, akarudi nakuanza kucheka sana. “Baba bwana!” “Eli naomba uende ukalale, sasa hivi.” “Sawa mama. Na mimi humniiti chumbani?” “Hapana Eli. Nenda ukalale.” Eno alicheka akaondoka, Eli akamfuata nyuma. “Nyumba inaupendeleo hii! Wengine wanaongeleshwa chumbani, wengine tunaongeleshwa hadharani tu.” Eli alisikika akilalamika huku akifunga mlango.

Onyo kwa Elvin juu ya Bella.
Elvin aliingia chumbani kwa wazazi wake akakaa kwenye kochi. “Najua unampenda sana Bella, Elvin. Na ninajua umetoka kwenye ndoa ya matatizo makubwa sana. Na ninaelewa Bella ndio faraja pekee unayoihitaji sasa hivi.” “Mpaka kifo baba.” “Sawa Elvin. Lakini katika njia sahihi. Hutaruka njia hata moja.” Elvin aliinama akijua wazi baba yake anachoongelea. Aliwafundisha wanae wasiguse msichana kimapenzi mpaka siku ya ndoa. “Sawa Elvin?” Elvin alinyamaza. “Naomba usimguse Bella, mpaka utakapo kabidhiwa rasmi. Uliyopitia kwenye maisha, hayaondoi uhalisia wa uwepo wa Mungu na heshima yako kwake. Unanielewa Elvin?” Elvin alibaki kimya. “Najua una maswali mengi sana na umekata tamaa kwenye mambo ya Imani kutokana na ulipopita na Happiness mwanamke uliyemtoa kanisani. Lakini haikupi kibali cha kuharibu sasa hivi. Tutapata muda, na tutazungumza vizuri. Lakini nataka heshima kwa Bella, binti yangu. Usimguse mpaka ulipe mahari, na umuoe.” “Nalipa mahari wapi sasa?” “Utakapofika muda wakulipa mahari tutajua pakupeleka hiyo mahari.” “Nataka nikalipe mahari kesho, Jumapili nimuoe Bella.” “Hapana Elvin. Hebu niangalie mimi.” Mama yake alikaa sawa. “Acha haya mambo ya Masha yapite awe ametulia ndio mpange mambo ya harusi.” “Unakumbuka ushauri wako wa mara ya kwanza juu ya Bella, nilipotaka kumvalisha pete ya uchumba? Haupishani na huu. Ona kilichotokea. Haya, unakumbuka ushauri wako juu ya Happiness mpaka nikamuoa? Umeona kilichotokea? Nimepoteza watoto wawili, Bella akaondoka na kwenda kuzaa tena na Masha. Safari hii naomba mimi ndio niwe na maamuzi juu ya maisha yangu.” Mama Mwasha alinyamza kimya nakurudi kujiegemeza nyuma.

“Hapana Elvin. Makosa yalitendeka, tumekubali tulikosea. Lazima tuanze upya.” “Mimi sitaanza upya. Naendelea na Bella. Niliwaambia tokea mwanzo mlipojua kuwa Bella ni mjamzito wa Ric, kuwa namuoa Bella, sio kwa uzuri tu bali nina uhakika kuwa ni mke wangu. Hata sasa ana watoto wawili, sitasubiri. Bella ni wangu, nampenda na ananipenda. Nitamuoa kwa masharti yangu mimi sio nyinyi.” Elvin alikuwa mkali kwa wazazi wake. Akasimama. “Hatujakataa umuoe Bella, Elvin. Lakini…” “Hakuna lakini. Tena nikiona mnanisumbua, nitaondoka na Bella wangu na watoto, hamtakaa mkaniona tena kwenye maisha yenu na msinihesabu kama mimi ni mtoto wenu. Mmeshanipitisha kwenye shida nyingi sana kwa ushauri wenu. Inatosha.” Elvin alitoka na kuacha wazazi wake wamepigwa na bumbuazi. Mwasha alitaka kumfuata lakini  mkewe alimzuia. “Mwache kwanza Mwasha. Amechoka. Mwache leo apumzike.” “Nimemkuta amemkum…” “Waache. Wamevumiliana sana hawa watoto. Hebu wape nafasi kidogo. Utaongea naye kesho.” Mwasha na mkewe walilala.

Bella uso kwa Uso na Mama Masha na Junior.
Bella hakulala, usiku kucha alikuwa akipanga mipango yake mpaka ikakamilika. Akaamka asubuhi na mapema, watu wote wakiwa wamelala, akachukua gari la Elvin na kwenda kwenye nyumba aliyokuwa akiishi na Masha. Alifika getini akaambiwa asubiri Junior aamshwe. “Mwambieni ana dakika kumi tu, asiponifungulia hili geti litakalompata asinilaumu.” Geti lilifunguliwa baada ya muda mfupi sana, Bella akaingia mpaka ndani na gari. Aliliegesha karibu sana na mlango akashuka na kumkuta Junior akimsubiria mlangoni. “Unataka nini Bella?” “Usiongee karibu na mimi Junior. Unanuka mdomo. Nipishe hapo mlangoni.” Akiwa kwenye mshtuko mkubwa sana, alimpisha Bella akaingia ndani. “Unataka nini Bella?” “Vitu vyangu na vya Masha.” “Nimefungia chumba hicho hapo.” “Fungua sasa. Unasubiri nini?” Junior alienda akakifungua huku akimshangaa Bella. “Nini kinaendelea Bella? Mama amekutuma?” “Nitakwambia kinachoendelea baada ya muda mfupi kuanzia sasa.” Bella alichukua vitu anavyovitaka akaweka kwenye gari yake. Nguo zote za kushindia za Masha, hati yake na mwanae yakusafiria, vitu vya marehemu mdogo wake na kompyuta yake. Alipoweka vitu vyote kwenye gari, akarudi kukaa kwenye kochi palepale ndani akiwa na kompyuta yake mkononi huku Junior akimwangalia. Alifungua ile kompyuta na kuanza kufanya kazi chache kwenye ile ile kompyuta.

“Wewe Bella?” “Kapige mswaki uje hapa nikuonyeshe kitu.” “Acha kuniamrisha Bella.” Bella akacheka. “Unakwenda kupiga mswaki au mimi niondoke? Lakini usinilaumu. Mimi huwa sitishii kama wewe na mama yako mnavyofanya. Huwa ninafanya kweli. Usinicheleweshe Junior.” “Kwani lazima nikapige mswaki?” “Sipendi harufu ya pombe na bangi.” Alitoka msichana wa junior akiwa uchi kabisa. “Nini babe?” Yule binti alisimama pale mbele yao bila aibu. “Mwambie huyo msichana aingie ndani Junior. Haraka, nataka kukuonyesha wewe kitu niwahi kurudi nyumbani kwa wanangu.” Junior alirudi chumbani na yule msichana, baada ya muda mfupi, akatoka akiwa amepiga mswaki na akimumunya pipi kifua.
Macho yalimtoka Junior. “Hiyo ni nini sasa?” “Huo ni muda uliobaki wa hayo mazungumzo yote tuliyozungumza siku ile ofisi kwa Masha, na video zenu mkikiri ubaya mliofanya kwangu na nia yako yakutaka kumuua Masha. Huo muda ukiona umefika sifuri sifuri, ujue hayo mazungumzo yote yataingia kwenye kila mtandao unaoujua hapa nchini. Nimeingilia tv na radio zote za hapa nchini, huu muda ukifika sifuri mbili tu, chochote kilichokuwa kinatakiwa kitangazwe kwa wakati huo kitasimama, hii video ndio itakuwa ikionyeshwa katika kila television na sauti zenu zitasikika katika kila redio.” “Umechanganyikiwa wewe Bella? Unajua mama anataka kugombea uraisi!?” “Hujaniona nikichanganyikiwa vizuri Junior. Sasa ni hivi, nataka nimkute Masha ananisubiri getini pale nyumbani kwenu, naenda kumchukua sasa hivi. Mambo mengine nitaongea na mama yako.” Bella alisimama. Akataka kutoka. “Nikupunguzie usumbufu Junior. Huna utakachofanya sasa hivi kufanya hiyo video na mazungumzo yasiende hewani. Kama huniamini, nisimkute Masha na nesi wake wakinisubiri getini. Sitaingia ndani kugonga, na umwambie mama yako, sitakuwa na muda mwingine wakuongea naye isipokuwa leo. Kwa hiyo na yeye nimkute getini akinisubiri. Sasa hivi.” Junior alibaki akimsindikiza Bella kwa macho.

Alipofika mlangoni akageuka tena. “Wanangu wote wawili na mimi tunaishi kwa Mzee Mwasha, kama unataka kutuma majambazi ya kutuuwa, usianzie mbali, njooni moja kwa moja pale. Ila ukae ukijua, mimi peke yangu ndiye ninayejua jinsi yakuongeza muda kwenye hii kompyuta. Chochote utakachofanya, ujue mtakuwa hewani. Kwa hiyo wewe na mama yako mnajukumu la kunilinda mimi chochote kisitokee, si kwangu tu, bali kuanzia Masha, Mwasha na familia yake, na watoto wangu. Jitahidini kunilinda ili na mimi niwalinde kwenye hii kompyuta. Msiniudhi na mimi sitawaudhi.” Bella alitoka bila haraka na kompyuta yake mkononi. Junior alimpigia simu mama yake muda ule ule na kumueleza kila kitu.

*************************************************************

Alifika nyumbani kwa Masha alimkuta Masha akiwa bado ananguo za kulalia, yupo getini na mkewe. “Muuguzi wake yuko wapi?” Bella aliuliza, mara aliposhuka kwenye gari. “Anafika saa mbili.” Mama Masha alijibu. Bella aliangalia saa. “Nina haraka, sitamsuburi. Utampa pesa ya taksii aje na dawa zote anazotakiwa kunywa Masha. Akipona atarudi.” “Unataka nini Bella?” “Nitakwambia ambacho sikitaki Mama Masha.” Bella alijawa na ujasiri sana. “Naishi nyumbani kwa Mzee Mwasha sasa hivi. Sitaki kuiona sura yako wala vijana wako. Namaanisha majambazi wenzako, sitaki kuwaona pale kwa Mwasha. Sitaki umsogelee mtoto yeyote wa Mwasha au Mwasha mwenyewe. Sitaki mkono wako juu ya akaunti zangu zenye pesa nilizozihangaikia kwa jasho langu.” “Ni pesa ya Masha.” Mama Masha alimkata kauli. “Nimekwambia niliyoitolea jasho. Sijakwambia vyanzo vyake. Iwe hiyo pesa inatoka kwa mumeo au kokote kule, sitaki mkono wako juu ya pesa zangu. Hata kama ni kutoka kwa Masha, unajua jinsi nilivyo hangaika mpaka nikaipata? Kesho nikienda benki nataka nikute akaunti zangu zote zimefunguliwa. Sitaki mali wala pesa yoyote kutoka kwako wewe wala Masha. Vitu vyenu vina laana. Sitaki hiyo laana iwapate wanangu. Angalia wanao jinsi walivyoharibikiwa! Hata Masha akipona, sitataka mali yake yeyote mliyotafuta na wewe, labda aanze upya na nijue ni halali. Na yeye akipona na kuanza fujo sijui anataka watoto wake, habari zenu zitakuwa kwenye vichwa vya habari vya  kwanza katika vyombo vyote vya habari hapa nchini.” Mama Masha alikunja uso. “Sasa wewe, huyo Masha unamtakia nini?” “Mimi sio kama wewe. Mimi nataka uzima wa Masha sio pesa yake. Nataka wanangu wawe na baba, basi. Lakini sijashindwa kulea wanangu. Uliponifukuza siku ile usiku ulifikiri nitahangaika? Hata kidogo. Mimi sio kama wewe Mama Masha. Natumia akili yangu kuishi hapa mjini sio mwili wangu. Na ninafanya mambo yangu mimi mwenyewe, yawe mabaya au mazuri, nabeba majukumu yangu sitaki kumlaumu mtu. Siajiri watu wakunifanyia mambo yangu kama wewe unavyo ajiri vijana wasio na hatia kukufanyia maovu yako.” Mama Masha alitulia.

“Na ninataka ujue tu, kwanza wakina Mwasha wameshakugundua kama yule aliyekuwa mke wa Elvin ni pandikizi lako, na hizo video na mazungumzo niliyomuonyesha Junior, natakiwa kila baada ya masaa 24, niwe naongeza muda, ili visije vikajituma kwenye vyombo vya habari. Kwa hiyo usalama wako, na mbio zako zote za uraisi vyote hivyo vinategemeana na furaha yangu. Hakikisha huniudhi Mama Masha. Sikufuati kwako na mali zako, na wewe usinisogelee mimi, wanangu, Mwasha na familia nzima ya Mwasha. Utajilaumu.” “Sina shida na Masha. Hata ukitaka kukaa naye moja kwa moja kaa naye tu. Kwanza ashaharibika huyo. Hamna kitu hapo, hata ukitaka kulala naye, hawezi.” Bella aliumia sana lakini alijikaza.

“Nisaidie kumuingiza kwenye gari.” “Ona alivyolowa mikojo! Siwezi kumshika mimi.” Mama Masha alijibu akionyesha uso wa kinyaa. “Wewe ni shetani Mama Masha.” Bella alimsogeza Masha aliyekuwa akiwasikiliza tu tokea mwanzo, akavuta wheelchair yake mpaka kwenye gari na kuanza kuhangaika kumvutia ndani ya gari, mpaka alipoweza. Peke yake huku Mama Masha akimwangalia. Alikunja kile kigari {Wheelchair} akaweka nyuma ya gari. “Nikupe na diaper zake? Haja zote hapo hapo. Hana analoweza.” Mama Masha aliongea kwa kejeli huku akicheka. Bella alipanda kwenye gari, akashusha kioo. “Hakikisha huniudhi Mama Masha. Nitakuharibia mjini hapa, utashindwa kukaa mtaani ila jela peke yake.” Bella alipandisha kioo na kuondoka.

“Bella na Masha akiwa mgonjwa nyumbani kwa Mwasha.”
Alifika nyumbani kwa Mwasha, akamuweka Masha kwenye kigari chake{Wheelchair}, akamsukuma kwa shida mpaka ndani. Alikuta nyumba nzima imeamka wapo sebleni kwa mwanae mdogo kulia. Tito alikuwa akilia kama kengele. Bella alimuacha Masha katikati ya njia na kumkimbilia mwanae. Kila mtu alisimama kuwaangalia yeye na Masha asubuhi ile. Mama Mwasha alikuwa akizunguka nyumba nzima akimbembeleza huyo mtoto. “Unanuka sana Bella. Nenda kaoge kwanza ndipo umchukue mtoto umnyonyeshe.” Elvin alimzuia kabla hajamchukua mtoto. “Ric yuko wapi?” “Ameingia chumbani sasa hivi anamtafutia Tito mchezo wakumnyamazisha.” Elvin alijibu. “Ric! Ric! Njoo umuone dady.” Walimsikia Ric akikimbia na kutoka kwa kasi sana. Alipomuona Masha alimrukia na kumkumbatia. “Dady!” Ric alianza kulia. “Bella naomba ukaoge uje umchukue mtoto.” Elvin alimshtua Bella. “Masha anahitaji kuoga, nilikuwa nafikiri nim..” “Hapana Bella. Mimi nitamsafisha Masha. Wewe nenda kaoge kisha mtulize mtoto.” Bella aliingia kuaga haraka sana, na kutoka akiwa anakimbia. Alimchukua mtoto wake akambeba. Alipomshika tu akatulia na ukimya mkubwa ukazuka ndani ya ile nyumba. Ric bado alikuwa amemkalia baba yake palepale kwenye wheelchair huku ameficha uso wake shingoni kwa baba yake. Wote ni kama walikuwa wamepigwa na bumbuazi.

“Samahanini niliamka asubuhi asubuhi bila kuaga. Nilitaka kuwahi kabla watoto hawajamka, lakini naona nimechelewa.” Bella alivunja ukimya, lakini bado wote walikuwa kimya. “Na kama mkiona nafasi haitoshi, labda tutawabana, tunaweza kuhamia nyumbani kwetu na Mzee Masha.” Elvin naye aliongeza. “Hamna haja yakufanya hivyo Elvin. Eno na Eli wataondoka kesho kutwa, nafasi itakuwepo tu.” Mama Mwasha alijibu.  “Hata mnaweza kutumia chumba cha JJ. Sidhani kama atakuwa na shida.” Mzee Mwasha aliongeza. “Asante baba.” Elvin alijibu na kumgeukia Ric na baba yake. “Twende ukanisaidie kumbadilisha nguo dady, Ric.” Ric alitingisha kichwa. “Shuka basi unisaidie kusukuma gari yake.” Ric alicheka, akashuka. Akakaa pembeni ya baba yake akisukuma upande mmmoja na Elvin naye alisukuma wakaingia chumbani. Bella alicheka, akaingia chumbani kunyonyesha. “Pole Tito wangu eeh! Pole sana kipenzi changu.” Walimsikia Bella akiongea na mwanae kwa sauti ya upendo na ya chini.

“Bella aanza kumlea Masha.”
Elvin alimsafisha Masha vizuri akamtoa pale sebleni. Ilikuwa ngumu Ric kuondoka kwa baba yake. Bella naye akatoka na mtoto, kabla hajakaa wakasikia mtu anagonga mlangoni. Elvin alifungua mlango. “Nimetumwa kwa Bella!” Bella alisogea mlangoni na kukutana na dada aliyevaa nguo za nesi. “Nimetumwa na Mama Masha.” “Wewe ndiye ulikuwa ukimuhudumia Masha?” “Ndiyo.” “Karibu ndani.” Bella alimkaribisha ndani. Masha aliinama hakutaka kumtizama yule dada machoni. Bella aliona hakuelewa vizuri. Aliposalimia akamwambia wakakae sehemu ya kulia chakula.

“Huwa unampa Masha vyakula vya aina gani?” “Vya kawaida.” “Kwa hali yake jinsi alivyo, anaweza kutafuna vizuri?” Yule muuguzi kimya. “Unamlisha?” Bella aliuliza tena.  “Wakati mwingine.” “Na wakati mwingine nani anampa chakula?” “Kama hataki kula nifanyaje?” Bella alianza kukasirika. “Huwezi kufikiria labda hajapenda hicho chakula ulichomwandalia?” Kimya. “Unapokataa kula unafanyaje?” “Namuachia chakula mezani.” “Wakati hawezi kutembea na mkono wa kulia hauna nguvu! Unambadili nguo mara ngapi kwa siku? Au unambadilisha diaper mara ngapi?” Kimya. “Hujui au hutaki kunijibu? Usinipotezee muda. Umenisikia?” “Sihesabu.” “Umekuja na mashine yake yakumpima pressure?” “Ndiyo. Mama Masha amenipa nikuletee.” “Unampima mara ngapi kwa siku?” Kimya. “Naomba uondoke kabla hujaniudhi zaidi. Na kamwambie Mama Masha, kesho saa mbili asubuhi nataka aniletee nesi mwingine, wewe sikutaki.” Yule dada alibaki ameshangaa. “Naomba usimame na uondoke dada. Sioni kama unaweza kumuhudumia Masha. Kwanza ni kama ana hofu na wewe. Nenda usije ukafanya pressure yake ikapanda. Mwambie Mama Masha saa mbili kamili kesho asubuhi, niwe nimepata nesi anayeweza kukaa na Masha, na anayejua kujibu maswali. Aje na dawa zake zote hapa.” “Dawa hizi hapa.” “Nipe maelekezo ya hizo dawa, kisha uondoke.” Kila mtu alimshangaa Bella alivyokuwa mkali na anavyoweza kutoa amri kwa Mama Masha. Baada ya maelezo mazuri, akamfungulia mlango yule muuguzi, “Naomba uondoke.” Yule muuguzi akatoka.

“Vipi mama?” Mzee Mwasha alimuuliza Bella. “Sidhani kama ni mtu mzuri kwa Masha, baba. Alipoingia tu nimemuona Masha ni kama amemuogopa, akainama.” Bella alijibu. “Naona pia hakuwa anambadilisha mara kwa mara. Nimeona Masha anamadonda sehemu ya diaper. Nitaenda kumtafutia dawa.” Elvin naye aliongeza. “Asante Vin. Basi ngoja mimi nikampikie uji.” Bella alienda jikoni. Alimtengenezea uji mzuri wa ulezi, akamuwekea mezani. “Mlete hapa mezani ajaribu kula.” Elvin alimsogeza. “Shuka basi Ric, dady ale!” Bella alitaka kumchukua Ric, lakini Masha alimshika kwa nguvu kidogo kama kumtaka amuache tu pale pale jinsi alivyompakata. Bella alimuhurumia sana Masha. Alijua ni kiasi gani anavyompenda Ric. “Utakulaje Masha? Kula kwanza ndio umpakate.” “Mwache tu.” Masha alijibu kwa shida kidogo huku mate yakimdondoka, lakini Bella alielewa. “Unaweza kula mwenyewe au nikulishe?” Bella aliuliza kwa upendo. “Nitajaribu.” Masha alijibu kwa kuunganisha maneno. Elvin alikuwa amemuwekea kitaulo kidogo cha kujipangusa. Alipoona anajimwagia, Bella aliamua kumsaidia. Alimuwekea uji kwenye kikombe badala ya kunywa na kijiko kwani mkono ulikuwa ukitetemeka sana. Alimuwekea kile kikombe mkono wa kushoto ambao ulikuwa na nafuu, ndipo alipoweza kula. “Lazima upone T. Watoto wote wanakuhitaji. Na huko kutetemeka ni njaa tu, wala sio ugonjwa. Unaonekana ulikuwa huli vizuri. Umekonda. Ukila vizuri, utarudia afya yako.” Bella alikuwa akiongea kwa sauti ya chini akiwa na Masha mezani. “Pole sana kwa matatizo, T.” Bella aliongeza. Masha alibaki akimwangalia kwa uchungu sana. Alikula akamaliza uji wote. Bella alisafisha meza na kurudi kukaa pembeni yake.

“Mazuungumzo ya kwanza ya Bella na Masha, baada yakufukuzwa nyumbani kwake na Mkewe”
“Nilijifungua!” Bella aliongea huku machozi yakimtoka. “Pooo lee.” Masha alijibu. Wala sikupata shida. Elvin alikuwepo na mimi, kuanzia napatwa na uchungu, chupa inapasuka, akatuchukua mimi na Ric kutoka pale tulipokuwa tukiishi, akanikimbiza hospitalini tukiwa na Ric, akaingia na mimi mpaka kwenye  chumba chakujifungulia. Halafu wala sikukaa sana kwenye chumba cha kujifungulia. Niliingia na kutoka, kama nilienda kupewa mtoto.” Bella alikuwa akiongea huku akilia na kucheka. Masha alitabasamu. “Ni..li..jua  u.taw.e.za Bella.” Alijibu, Bella akacheka. “Amefanana na wewe huyo! Mpaka ukucha wa mguu. Na ni mkali kama wewe. Hataki mtu amshike ila mimi tu.” Masha alitabasamu. “Akiamka nitakuletea umuone.” Masha alitingisha kichwa. “Umefurahi kumuona Ric?” Bella alimuuliza tena huku ametulia kabisa. Masha alimtizama Ric, kisha akatingisha kichwa na kumshika mwanae. “Lazima ukazane upone Masha. Jitahidi kupunguza mawazo. Mali zinatafutwa, lakini sio uhai. Watoto bado wadogo, wanakuhitaji sana wewe. Tulia hapa kwa muda, kila kitu kitakuwa sawa. Unanisikia Masha? Usiwe na wasiwasi.” Masha alitingisha kichwa. “Uliugua sana?” Bella aliendelea kuuliza. Masha alibaki akimwangalia kwa huzuni. “Walikutesa sana?” Masha alibaki kimya. “Pole sana. Kila kitu kitakuwa sawa.” Alimuona machozi yakimtoka. Kila mtu alikuwa sebleni akiwasikiliza.

“Bella! Mwache akapumzike, akiamka mtaongea vizuri.” Elvin aliwasogelea. “Unataka kwenda kulala na dady?” Elvin alimuuliza Ric. Ric alitingisha kichwa. “Shuka basi hapo kwenye gari yake, unisaidie kusukuma tena?” Ric alishuka kwa furaha baada yakupewa jukumu lakumsukuma baba yake. “Kwani anaumwa?” Ric alimuuliza Elvin. “Kidogo tu, lakini atapona.” Akamsaidia Elvin kumsukuma mpaka chumbani kwa Elvin ambako ni chumba cha ndani. Baba yake alipopandishwa tu kitandani, Ric naye akapanda na kwenda kulala pembeni yake. Akamkumbatia. Wakati wote Masha alisema Ric ana upendo kama wa mama yake.

*************************************************************

Bella alikuwa na furaha sana ya kukubaliwa kumsaidia Masha. “Asante Vin. Asante sana mpenzi wangu. Njoo na wewe ukae upumzike, halafu ule.” Bella alimuwahi Elvin mara tu alipotoka chumbani, kumlaza Masha. “Karibu.” Elvin alijibu. “Amelala?” “Nimemuacha amejipumzisha, labda atalala baadaye.” “Nataka Mama Masha aniletee nesi mzuri ili tukiwa tunaenda kazini tuwe tunamuacha naye. Kuanzia kesho utapumzika Vin wangu.” “Usijali Bella. Ushafikiria juu ya mtoto?” “Si umenikubalia kuwa tutakuwa tunaenda naye? Umesema utanirudishia ofisi yangu. Au umebadili mawazo?” “Hapana. Nilitaka kujua kama umebadili mawazo.” “Hakuna kitakachobadilika Vin. Tutafanya wote kazi. Unakumbuka ile akaunti yangu yenye pesa nyingi nilikwambia Mama Masha aliamuru ifungwe? Nimemwambia aifungue. Tutakuwa na pesa ya kuongezea mtaji, kila kitu kitaendelea kama tulivyopanga.” “Unauhakika Bella?” “Kabisa Vin. Mbona una wasiwasi tena?” “Hapana. Nataka uhakika.” “Nimeamua kuanza maisha na wewe Vin. Jua litoke, mvua inyeshe, nitakuwa na wewe.” Elvin alicheka. “Kweli Vin. Hakuna kitakachobadilika. Masha akipona tu, anaondoka. Nataka tumsaidie apone, arudishe nguvu, basi. Kwa hiyo nivumilie tafadhali.” “Usijali Bella. Nimekuahidi tutakuwa wote, hakuna kitakachobadilika.” Bella alisimama na kumbusu Elvin kisha akanong’ona. “Nakupenda Vin.” Elvin alitabasamu. “Asante.” Siku hiyo Bella na Elvin walisaidiana kumlea Masha na watoto, bila shida. Masha alikuwa msafi na Bella alimpikia vyakula laini sana ambavyo havikumsumbua kula.

*************************************************************

Siku inayofuata, wakiwa wameamka na Elvin amemtoa Mzee Masha chumbani akimleta mezani kwa kifungua kinywa, walisikia mtu akigonga mlangoni. Eno alifungua mlango. Aliingia Mama Masha na nesi mwingine. “Karibu ndani Mama Masha.” Bella aliruka kama swala. Alisogea mlangoni. “Unafanya nini hapa?” “Bella jamani!” Mama Masha aliongea kwa kujibaraguza na tabasamu la hofu usoni. “Usiniudhi Mama Masha. Nilikwambia nini? Unataka nini?” “Nimekuletea huyo muuguzi mwingine, naamini utampenda. Chukua hizi.” Bella alisogea na akapokea kitu alichokuwa akipewa akidhani labda ni dawa za Masha kumbe ni funguo. “Hukua na sababu ya wewe kuja hapa Mama Masha. Unanichokoza.” “Nimekuja kumuona na Masha.” “Acha uongo na unafiki. Huna wakumdanganya hapa.” Hakuna aliyemuona Bella akiwa mkali vile. “Kamsubirie Masha nyumbani kwenu. Akipona tu, atakufuata huko huko kwenu. Hapa hatakaa. Sitaki kukuona tena hapa. Kwanza hizi funguo za nini?” “Gari.” “Gari ya nini?” Bella aliuliza kwa ukali huku na mshangao. “Itakusaidia Bella. Tena sasa hivi unauguza.” Bella aliirusha ile funguo na remote yake kwenye ukuta kwa nguvu sana, karibia kumpiga nao Mama Masha. “Nilikuonya usinichokoze Mama Masha. Tafadhali.” Elvin alimchukua Ric na kumuingiza chumbani.

“Bella!” Mama Masha aliita kwa upole na mshanga. “Nini? Sio wewe ulinifukuza usiku wa manane nikiwa mjamzito na mtoto mdogo? Ukitaka kunikomoa. Ulifikiri nitashindwa maisha? Kwanza ni kama ulinitoa kwenye laana yenu na mme wako. Mali zenu zina laana. Wewe na Masha, wote mali zenu zina laana. Sitaki hata shilingi yako wewe wala Masha. Utalipia garama zote za matibabu ya Masha, na dawa zake. Pamoja na muuguzi wake. Usiwahi kuleta hata sukari humu ndani na usirudishe sura yako humu ndani tena.” “Unanidhalilisha Bella.” “Excuse me!?” Bella alimsogelea karibu zaidi. “Unasemaje Mama Masha? Nisubiri hapo hapo, nikuonyeshe kudhalilishwa kulivyo.” Bella alienda kuleta simu yake akamfungulia baadhi ya mitandao, akamuonyesha video alizokuwa ametuma Zera na Irene wakimcheka Bella usiku waliomfukuza.

“Sasa huku ndiko kudhalilishwa. Ninachokifanya sasa hivi, nikukutaka unipe nafasi, nikuonyeshe jinsi wanawake wanavyotumia akili kuishi hapa mjini. Si ulitaka niwalee hawa watoto bila pesa yenu? Mbali na mabaya yote uliyonifanyia wewe, mumeo Masha, Junior na Zera, bado uliniadhibu, tena uliniadhibu vibaya sana, ukiwa umemuua mdogo wangu. Na sasa ninakuapia Mama Masha, hawa watoto watasoma kwa jasho langu, na Masha yupo hapa kama baba yake Ric na Tito si vinginevyo. Sihitaji hata shilingi yenu, lakini akipona Masha, ujiandae wewe, yule rafiki yako, sijui ni katibu mkuu wa chama, sijui waziri, sijui ni nani, wewe unamjua na wadhifa wake, Junior, Zera na Irene, kuja kuniomba msamaha WA MA GO TI! Umenielewa?” “Haiwezekani Bella. Unajua yule mama hawezi kukubali.” “Nakuapia kwa Mungu, mtanipigia magoti Mama Masha. Kama kweli yeye ni rafiki yako, na anakupenda, mwambie hiyo siku nitakayowaita, ajiandae kunipigia magoti. Tena Zera akiwachukua video na kuisambaza kwenye mitandao tena akisafisha jina langu. Mwambie Zera ajiandae. Nguvu ile ile aliyotumia yeye na Irene kunichafua, ndio nguvu hiyo hiyo itahitajika siku hiyo. Umenielewa Mama Masha?” Mama Masha alinyamaza. “Sasa naomba uondoke na usirudi tena hapa. Ila nataka jina la daktari anayemtibu Masha, na ukaweke appointment, huko hospitalini, kuanzia Tarehe 2, yaani sikukuu za mwaka mpya zikiisha, Masha anaanza mazoezi ya viongo. Masha sio mlemavu. Haya ondoka na nesi wako. Kwanza mchafu sijui umemuokota wapi, kesho mlete mwingine, anayejua kuoga na kupiga pasi nguo zake mwenyewe, huyu uliyemletea Masha ni dharau. Kwa kuwa hata wewe mwenyewe huyo huwezi kumtumia nyumbani kwako, haya ongoza njia ondoka.” Bella alikuwa amekasirika sana.

“Nakuomba dada yangu unipokee. Nina shida sana na kazi. Mama yangu mgonjwa, nategemea pesa mtakayo nilipa nimuuguze.” Yule nesi aligoma kutoka na kuanza kumsihi Bella kwa machozi. Mshahara aliokuwa ameahidiwa na Mama Masha ulikuwa mkubwa sana. Kwa elimu yake, alijua wazi asingeweza kulipwa kiasi kile popote pale. Alipiga magoti. “Tafadhali dada. Wewe uniambie chochote chakufanya, nakuahidi nitafanya. Nikishindwa ndio unifukuze.” Bella alianza kuingiwa na huruma. “Samahani sana dada yangu. Sikutegemea kumuona huyu mama hapa ndio maana nimeongea maneno ya kukukashifu. Samahani sana.” “Hamna shida dada.” “Kwa hiyo anabaki au nikuletee mwingine?” Bella alikaa kimya kwa muda akijaribu kufikiria. “Bella!” “Naomba usiniite jina langu. Tafadhali sana. Wewe ondoka tuachie huyu dada. Ila mfikishie ujumbe jambazi mwenzako, Irene, mwambie Bella anaolewa na Elvin. Mwambie Elvin amesema ananipenda na atanioa.” Eli aliposikia hivyo alishtuka na kucheka kwa sauti. “Tutawaletea kadi ya harusi. Hatuchangishi mtu, tunafunga harusi kwa pesa yetu. Haya ondoka.”   Mama Masha aliondoka bila kuaga.
Watu wote walikuwa kimya kabisa wakisikiliza. “Njoo ndani Bella.” Elvin alimwita Bella mara baada ya Mama Masha kuondoka. Bella alimfuata nyuma na kuingia chumbani, akaanza kulia kwa kwikwi kama aliyefiwa. “Pole sana Bella.” “Samahani Vin, nilishindwa kuzuia hasira zangu. Nimeharibu?” Elvin alicheka kidogo huku akimtizama. “Niambie bwana, usinicheke.” “Nimefurahi kuona upande wako mwingine.” “Mungu wangu Vin! Ni mbaya sana? Unaniogopa?” “Hapana. Umenifurahisha, umeweza kuwa muwazi. Nazidi kukuelewa zaidi.” Bella alibaki amepigwa na butwaa. “Nini sasa?” “Umebadili mawazo?” “Yakufanyaje?” “Juu yangu?” Elvin alicheka tena. “Hapana Bella. Nimefurahi nimejua leo nafasi yangu. Nilikuwa na wasiwasi kweli. Nilihofia Masha akija kupona unaweza ukabadilika na kuamua kuhama naye, kwa kuwa mmesha zaa naye.” “Elvin wewe? Nilikwambia huo ni ukurasa niliofunga. Nataka tuanze upya na wewe. Tutahangaika kadiri Mungu atakavyotujalia, tutakuwa na mali zetu na watoto wetu.” “Mwenzako nataka watoto kweli Bella.” “Najua. Na nina amini Mungu atatujalia Vin, usiwe na wasiwasi.” “Nimefurahi umenituliza.” Bella alicheka. “Unajuaga kuniokoa wewe? Maana pale baada ya fujo zote zile sijui ningewaangalia vipi watu waliobaki pale sebleni. Hasa baba na mama.” Elvin alicheka. “Nilijua tu hasira zikikuisha, utaishiwa na nguvu.” “Asante Vin kwa kunifikiria. Kweli wewe ndio mume wangu.”

 Elvin alimsogelea Bella na kuanza kumbusu tena. “Wewe Vin! Jana baba ilibaki kidogo atubambe.” “Usiogope bwana Bella. Labda kama hutaki nikubusu.” “Nataka sana.” Bella alicheka na kujirudisha karibu na Elvin. Baada ya muda, Elvin alikumbuka msichana aliyeletwa kwa ajili ya kumsaidia Masha. “Tutoke tukaongee na yule nesi, jinsi yakumuhudumia Masha.” “Kweli. Lakini nisindikize kwanza nikawaombe radhi baba na mama.” Elvin alicheka, akamvuta mkono wakatoka.

*************************************************************

Bella alitoka akiwa na hofu kwa wazazi wa Elvin. Walisogea mpaka sebleni. “Samahani baba na mama.” “We Bella! Na sisi pia tulikuwepo hapa wakati unagomba.” “Nyamaza Eli bwana.” “Dharau hizo Bella. Na mimi naomba uniombe msamaha.” “Haya samahani Eli, Eno, baba na mama. Nilishindwa kuzuia hasira.” “Pole Bella mwanangu. Lakini njaa inauma mama. Si unajua sijala tokea niamke?” “Ngoja nikutengenezee kifungua kinywa baba yangu. Mama umenisamehe?” “Kwanza umenifurahisha. Hizo ndizo akili za kukua. Lazima wakuheshimu, sio kukufanya toi la kuchezea vile wanavyotaka.” Bella alicheka. Akataka kwenda kumbusu Mama Mwasha, akasita kidogo, na wote waliona.
“Lakini hebu tuambie Bella, umewezaje kumuweka Mama Masha mkononi? Anakutetemekea kama sio yeye jeuri!” Eli aliuliza. “Ukitaka nikusimulie twende jikoni, ukaoshe vyombo wakati mimi napika. Si umesikia baba njaa inamuuma?” “Stori za Bella zina masharti! Wakati mimi nikikusimulia za kwangu wala sikuzungushi.” “Kama hutaki basi.” Bella alianza kuondoka, Eli alisimama haraka haraka na kumfuata Bella nyuma. “Na Bella ndie anayekuweza wewe Eli.” Wote walicheka. “Ashaujua udhaifu wangu huyu, mama. Ndio maana ananitesa.” “Udhaifu wako upi?” Bella alikuwa anacheka. “Nakupenda.” “Hilo nalijua.” “Na mimi Bella mwanangu.” “Wewe nakuletea uji wako sasa hivi mama yangu, unywe wakati unasubiri kifungua kinywa chenyewe. Twende sasa.” “Kwani nina ubishi mbele yako?” Wote walicheka na kuingia jikoni.

*************************************************************

Wakiwa jikoni Bella alianza kumsimulia Eli kila kitu. “Kweli wewe mwanamke Bella. Ndio maana nakupenda.” Bella alicheka. “Asante Eli. Nafikiria wanangu Eli. Ric angekuwa mdogo sana, hafahamu kuwa baba yake ni Masha, ingekuwa habari nyingine. Ningesema nimsahau kabisa Masha niendelee na maisha yangu. Lakini Ric anamfahamu baba yake na anampenda sana. Ni hivyo tu Ric ni mpole na hawezi kusema. Lakini kwa kuwa nilikuwa nikiyafahamu mahusiano yao tokea zamani, nilijua ni nini anakosa mwanangu. Hakuna mwanadamu anayeweza ziba pengo la Masha kwa Ric. Na Masha anampenda sana mwanae. Kuna vitu alikuwa akimfanyia Ric, nilijua Ric atateseka sana bila baba yake.” Bella alianza kulia. “Lakini japokuwa Masha ameniudhi sana kutoniambia ukweli wa kilichokuwa kikiendelea tokea zamani, inabidi nisamehe na kuendelea tu. Masha amenisaidia sana, siwezi kusahau hilo. Kipindi hiki cha mwisho tuliishi naye vizuri sana, sijawahi ona mtu mwema kama Masha. Alisababisha nikasamehe mabaya yote aliyonitendea. Lakini kilichoniumiza nikutokuniamini, Eli. Aliweza kuwaita kina baba ofisini kwake, kuwaambia ukweli wa hatari inayonizunguka na kuniacha mimi nyumbani sina taarifa. Nilimpigia simu kumwambia kinachoendelea pale nyumbani. Kwamba kuna watu wamekuja pale wanataka kunivamia, hata asiniambie kitu, ameacha nimefukuzwa nikiwa mjamzito na mtoto mdogo, tena usiku! Ningebakwa mimi na mwanangu?” “Alikuwa akijaribu kufikia muafaka na mkewe kabla hajakwambia na kukuogopesha kwa kuwa ulikuwa mjamzito, Bella. Masha alikuwa anajaribu kukulinda wewe na mtoto. Isingekuwa hivyo wangekudhuru siku ile.” “Basi alishindwa kutulinda kwa asilimia zote Eli. Masha haniamini. Alijua kinachoendelea kwa muda mrefu sana. Na mimi nilishamuona hana raha, nikawa nikimuuliza kila anaporudi nyumbani. Hakutaka kunihusisha. Unajua alipoona hatari kubwa, akamwachisha mtoto shule, akamtafutia mwalimu wakuja kumfundisha pale pale nyumbani? Tena alikuwa anamlipa pesa nyingi tu. Haya, aliongeza ulinzi pale nyumbani, kila nikiuliza kuna nini, hakutaka kuniambia.” “Ulikuwa mjamzito Bella. Hakutaka kukutia wasiwasi.” “Hapana Eli, hakuniamini tu. Masha ananijua jinsi nilivyopita kwenye magumu na nikaweza. Angenishirikisha kuwa maisha yangu na wanangu yapo hatarini, ningeweza hata kumshauri.” “Ungemshauri nini?” “Hata kuhama nchi kwa muda, Eli. Wakati ule tulikuwa na Visa za nchi zaidi ya tatu. Tulikuwa hatuhitaji kurudi kwenye ubalozi wowote ule kuomba Visa. Ilikuwa ni kiasi cha sisi kukata ticketi na kuondoka nchini kwa muda, kuweka usalama wangu na watoto wetu sawa. Lakini Masha aliweka maisha ya watoto wangu hatarini zaidi. Siwezi kumsamehe kwa hilo, hata iweje Eli. Nataka apone, niachane naye. Hajawahi kuniamini Masha. Sio kwa hilo tu ni katika kila eneo la maisha yetu. Tokea tunaanzana naye, hajawahi kuniamini. Nilijitahidi kumuonyesha kwa vitendo, kuwa nimetulia na sitamsaliti, lakini bado alikuwa akilipa watu wa karibu yangu kunifuatilia kujua nyendo zangu. Alifikiri sifahamu, lakini niliamua kunyamaza tu. Alishanipiga karibu kuniua kwa ujumbe uliokuwa umeingia kimakosa kwenye simu yangu akijua nilikuwa nawasiliana na mwanaume mwingine, kumbe nilikuwa nikiwasiliana na yeye mwenyewe. Hajawahi kuniamini, na hatakaa aniamini. Hata nifanyeje. Na mimi siwezi kuishi hayo maisha Eli. Japokuwa nina watoto wawili, kutoka kwa mume wa mtu, lakini mimi ndio najua ukweli wa tabia yangu Eli. Mimi ni mwaminifu sana. Siwezi kumsaliti mtu hata iweje, na ndio maana siwezi kutoa ahadi za uongo. Pia siwezi kumfanyia mtu ubaya. Ila Masha na familia yake wamenitangazia vita mimi na wanangu, lazima nijipange. Siwezi nikaacha unyama walionifanyia mbele ya Ric, ukaja kutokea tena. Masha aliruhusu watudhalilishe, na kuacha mwanae anatupwa nje ya nyumba usiku ule, lakini sio mimi Eli. Nitapambana nao, na watalipa ubaya walionitendea, labda nife mapema.” Bella aliendelea kulia. “Pole Bella. Acha kulia sasa!” “Sitatulia Eli. Mchana na usiku, mpaka nihakikishe na mimi nakuwa mtu fulani hapa duniani. Nitamuonyesha Mama Masha mimi ni mwanamke, na hakukosea kunitoa kwenye mali zao. Kule kunifukuza, kwangu mimi nahesabu ni kama alikuwa akinikumbusha mimi ni nani. Nitajenga nyumba zaidi ya kumi hapa mjini, nitamiliki biashara, sio ya kuuza vitu vidogo, watu watanitambua mimi ni Enabella, na wakimsikia mwanamke, watajua mwanamke sio kiumbe dhaifu kama wanavyodhani. Na wakati huo nitakuwa naitwa Enabella Mwasha.” Bella alipunguza sauti huku anafuta machozi. Eli alicheka sana. “Kumbe Dogo bado yupo ndani ya picha?” “Hakuna maisha bila Vin wewe! Kile ndio kichwa changu.” “Haya mama, unikumbuke tu kwenye ufalme wako.” “Nitakufikiria.” “Bella wewe?” “Nakutania bwana. Mimi na wewe Eli?” “Nilitaka kushangaa.” Waliendelea kucheka kule jikoni kama kawaida yao, huku kila mtu akiwasikiliza, safari hii mpaka Masha alikuwa akisikiliza na kuumia sana. Bella hakujaliwa hata nusu ya sauti ya Happiness. Hawezi kunong’ona, kumteta mtu hata kidogo.

*Elvin na Ombi la baba yake.*
Baada ya kifungua kinywa, Mzee Mwasha alimuomba Elvin watoke nje wakaongee.  “Kuna nini tena?” Elvin alimuuliza baba yake. “Mbona unawasiwasi? Nimekwambia nataka tukazungumze.” “Mimi na wewe tu bila mama?” Eli alianza kucheka. “Dogo, unataka kumbeba mtetezi wako kabisa? Maana mama kwa kumtetea Elvin!” “Hamna bwana.” Elvin alijibu. “Sasa unamuulizia mama wa nini, kama sio unataka mtu wa kwenda kukujibia maswali? Maana mama yeye wakati wote ana kazi ya kukukingia kifua, ndio maana hujui kuongea Dogo mpaka leo. Sasa wewe nenda leo na Mzee, peke yenu, ukabananishwe, uonje joto tunalopataga wenzako.” Bella alianza kuingiwa na hofu, alikumbuka fumanizi la siku iliyopita. “Acha kumuogopesha mwenzio. Nimazungumzo ya kawaida tu.” Mzee Mwasha alijibu huku anasimama. “Tutamuona sura yake akirudi. Maana baba bwana hajui kugomba, lakini neno lake moja tu, utakaa unalitafakari usiku kucha. Hata ukienda baa, bi.. Soda haishuki.” Wote walicheka. “Twende Elvin, acha kumsikiliza Eli.” Mwasha alichukua na funguo  za gari. “Kumbe tunatoka kabisa!” “Ndiyo. Tena mimi leo ndio nakuendesha.” Bella alizidi kukosa raha. Eli alizidi kucheka. “Dogoooo. Leo unaendeshwa na Mzee! Lazima unaenda kupata dozi za kiutu uzima.” “Eli! Naomba acha kumuogopesha mtoto.” “Mmemsikia mama jamani? Eti mtoto!” “Nyamaza. Usiogope mwaya Elvin. Kuwa na amani.” “Asante mama.” “Byeee Elvin.” Eli alimtania kwa kumuaga huku akimpungia mkono. “Yaani Eli!” Elvin alishindwa chakuongea, alicheka akatoka.

*************************************************************

Mzee Mwasha alimpeleka Elvin sehemu patulivu, akamuomba ashuke. “Kumbe huwa unafika huku?” Mwasha alicheka. “Tukae kidogo.” Walikaa, lakini Elvin alijua kabisa kitu baba yake anachotaka kuzungumza naye na alishamwandalia majibu yote. Mwasha alimwangalia mwanae, kwa utulivu ule, alijua kabisa alishaandaliwa majibu, lakini alikusudia kuongea naye tu. “Nilitaka kukwambia kitu ambacho sikuwahi hata kumwambia mama yako.” Elvin alitulia kidogo, kwani alijua tabia za wazazi wake, yakutofichana kitu. “Tokea zamani, nilipokuwa kijana, nilitamani sana watoto wa kiume. Tulipompata na Eno, nilianza kumwambia Mungu, hawa wawili wanatosha sasa, nahitaji wa kike angalau wawili. Tukafanya kila tulichojua kitatusaidia kupata mtoto wa kike, lakini Mungu akatupa Eli. Hatukukata tamaa yakuendelea kutafuta mtoto wa kike, lakini safari hii tukaamua kwenda kupata ushauri wa madaktari na tukamuomba sana Mungu. Nakumbuka kupata sana amani moyoni wakati mama yako aliponiambia ni mjamzito tena. Nilijua kwa asilimia zote wewe ungekuwa mtoto wa kike, kwa kuwa tuliomba sana, na kushirikisha watu watuombee. Siku moja yupo nabii akatuambia kuwa Mungu amesikia maombi yetu na amejibu. Tulifurahi sana, tukanunua baadhi ya nguo za mtoto wa kike, tukijua wewe ni mtoto wa kike. Ulipozaliwa wakiume, mama yako alisema hatajaribu tena kuzaa, wewe ndio mtoto wa mwisho. Niliumia sana, nikajaribu kumshawishi lakini alisema hatuna uhakika kama tukizaa tena tutapata mtoto wa kike, anaweza kuwa wakiume tena. Lilikuwa jaribu kubwa sana kwetu, si kwenye ndoa tu, bali hata kiimani. Kumbuka tulitabiriwa na kuambiwa kuwa Mungu ameshajibu. Ilinisumbua sana, lakini siku moja Mungu aliniambia neno moja, ilikuwa sio ndoto wala siwezi kusema ni maono, lakini baada ya yote niliyoyaona siku ile, kuna neno niliambiwa la mwisho, ilikuwa ni sauti iliyoongea kwa wazi, na sijawahi kusahahu. Iliniambia hivi, ‘Mungu si mwanadamu hata aseme uongo’. Nilishtuka kwenye yale maono au ndoto. Lakini ile sauti iliendelea masikioni mwangu ikisisitiza lile neno. Miaka ilipita nikitarajia labda mama yako atapata ujauzito tena, lakini hakuwahi kupata mtoto mwingine, na wala sikumwambia kama nasubiria mtoto mwingine. Nilijua utatokea muujiza tu atashika mimba.” Elvin alikuwa akimsikiliza baba yake kwa makini sana.

“Unakumbuka siku Bella anakuja ofisini kwetu kuomba kazi?” Elvin aliitikia. “Siku ile akiongea na sisi, huku akirudia rudia kutaja jina lake, ile sauti na lile neno lilinijia kwa upya. Mungu si mwanadamu hata aseme uongo’. Ndipo mchanganyiko wa mawazo ulipoanza na nikaanza kumuangalia Bella kwa jicho la tofauti. Wewe ni shahidi, Bella amekuwa mtoto kwangu zaidi hata nilivyotarajia. Katika umri wangu huu wa uzee, Mungu amenikumbuka. Amenipa Bella. Mapenzi niliyonayo kwa Bella, nikama mtoto niliyemlea tokea anazaliwa, tena na mama yako. Ni kama mwanangu wa kumzaa mimi mwenyewe. Hakuna atakachofanya Bella, kikanifanya nimchukie kama mtoto wa jirani. Najihisi ni kama nimekosewa na Eli au wewe. Na ninamshukuru Mungu, na yeye ananipenda kwa dhati.” “Sana. Bella anakupenda sana baba. Mpaka nahisi mama anaumia.” Mzee Mwasha alicheka.

“Nilishaongea zamani  na mama yako, kabla hajamfukuza. Nilimwambia ni kwa kuwa Bella alilelewa na mama tu. Hakuwahi kupata mapenzi ya baba, kwa hiyo yupo kama mtu aliye nakiu sana, kisha akaona maji. Sio kwamba ukimpa soda hatafurahia, lakini atafurahia sana maji kuliko soda. Ndivyo alivyo Bella kwangu. Na wote tunamjua Bella, hawezi kumchukia mtu. Anampenda sana mama yako, lakini hatuwezi kuficha ukweli, mimi zaidi.” Wote walicheka. “Na ndivyo hata nyinyi mlivyo. Sio kwamba hamnipendi, lakini kuna jinsi mnaonyesha upendo kwa mama yenu sivyo mfanyavyo kwangu.” “Hapana baba bwana!” “Ni kweli Elvin, japo naona na Bella naye amebadilika kidogo tangia arudi safari hii. Amejawa sana hofu. Ananiogopa kunisogelea kama zamani. Bella hakuwa akifiria pindi anapotaka kunikumbatia au kunibusu. Lakini amerudi na hofu.” “Mama alimuumiza sana. Ameingiwa na hofu. Hata ujasiri wa kuwaita mama na baba tena, nimeona umepungua sana. Sijui itakuaje!” Elvin aliongeza. “Unajua kujenga huwa inachukua muda, ila kubomoa ni rahisi sana.” “Unafikiri ni kweli mama aliingiwa na wivu kwa ukaribu wa Bella kwako?” Mwasha alinyamaza kidogo. “Tuache hayo. Hilo silo nililokuitia.” Elvin alijiweka sawa.

“Nataka Bella aheshimiwe kama binti mwingine yeyote. Sio kwa sababu ana watoto wawili, basi pasiwepo na heshima. Hapana Elvin. Bella amepitia pagumu sana kwenye maisha yake. Najua umeongea naye. Alitamani mambo ambayo anahisi hawezi kuyapata tena. Nakuomba Elvin, wewe uwe mtu utakayeweza kutimiza ndoto za binti yangu. Kama uliweza kufanya kwa Happiness, najua unaweza kufanya na kwa Bella pia. Anza hatua za ndoa kama kijana wa kawaida kwa binti wa mtu mwenye familia yakueleweka. Mtolee posa, mlipie mahari na kumsubiri mpaka siku utakapo kabidhiwa rasmi kuwa ni mkeo. Tafadhali sana Elvin.” Elvin alibaki ameinama. Aliishiwa maneno. “Sijui umenielewa?” “Bella hana wazazi baba. Hayo yote nayafanyia wapi?” “Ndio maana nakuomba uanze mwanzo kabisa kwa Bella. Ulimwambia atoe pete ya Masha kidoleni. Lini unapanga kuweka ya kwako kidoleni mwake?” Elvin alibaki kimya. “Nashauri uanzie hapo. Na ufanye haraka. Huwezi kujua kesho akitoka pale ndani, atakutana na nani huko nje.” “Usiniogopeshe baba. Bella ni wangu.” “Ndivyo ulivyosema mwanzoni, lakini unaona alipoishia?” “Si mambo yalitokea hapo katikati?” “Basi sasa, linalowezekana leo, lisingoje kesho. Kwa kuwa hujui jambo litakalotokea kesho, lazima ufanye hima. Ulimsikia Masha alivyosema, atafanya chochote hapa duniani ili kuwa na Bella? Yule binti amejaliwa akili ya kila kitu, hasa ya maendeleo. Utakapo ishi naye vizuri, utafika mbali sana, na yeye anakupenda sana, usibweteke.” Ilikuwa kama kengele masikioni mwa Elvin.

 “Masha asije akapona akanizidi nguvu, baba. Bella asije akaanza kazi akakutana..” “Tulia Elvin. Sikukuita hapa kukupanikisha. Nilikuja kukukumbusha, kitu cha thamani ulichopewa na Mungu. Usije kukichezea hata siku moja.” “Nampenda sana Bella, baba. Na asante kunikumbusha. Siwezi kumchezea kama Masha alivyofanya. Mimi nitamuonyesha kuwa na mthamini kiasi cha kumsubiri mpaka awe mke wangu.” “Kikao kimeisha.” “Hapana baba. Tuongee zaidi.” “Nilichokuitia hapa naona umekielewa. Mengine fikiria mwenyewe.” “Sasa kuhusu..” “Elvin! Tulia na anza kupanga mambo yako kwa makini kama siku zote unavyofanya. Usipaniki.” Mzee Mwasha alisimama kama anayetaka kurudi garini kisha akasita. “Nikuombe jambo la mwisho Elvin.” Elvin aliyekuwa amekaa akasimama. “Nini tena?” “Nataka nimuwekee misingi imara Bella, ambao hata kama atakuwa peke yake popote kule hatatikisika.” Elvin alikunja uso. “Nataka kumjengea mahusiano yake na Mungu.” “Sawa.” “Nataka ushirikiano wako katika hilo Elvin. Sitaki kumchanganya Bella. Sitaki mimi niwe namfundisha hiki halafu wewe mwenzangu una….” “Nimekuahidi sitamgusa baba. Mbona unashindwa kuniamini?” “Nihilo tu Elvin.” Mwasha alianza kuondoka. “Lakini baba!” Mwasha alisimama. “Mpaka lini?” “Hiyo ni juu yako Elvin. Wewe unamtaka lini Bella?” “Tokea siku nyingi baba na wewe unajua.” Mzee Mwasha alitabasamu. “Basi anza sasa hatua ya kwanza. Lakini…” Mwasha alisita. “Lakini nini tena?” Mwasha alitabasamu huku akisita. “Niambie tu, baba.” Mwasha alimsogelea Elvin. “Bella ananyonyesha.” “Yaani kuna vipingamizi kila mahali! Huwa wananyonyesha mpaka mtoto anafikia umri gani? Nataka kumuoa Bella.” Mzee Mwasha alitabasamu na kurudi garini.

Walirudi nyumbani Elvin akiwa kimya kabisa akiwaza. Walimkuta Bella, Masha na watoto wao nje wakicheza. Bella alipomuona tu Mzee Mwasha alimsogelea huku akionyesha wasiwasi mwingi usoni mwake, asijue kikao kile kimeendaje. Elvin alisalimia, lakini Bella alishindwa hata kumtizama, yeye akaingia ndani na kuwaacha Bella na baba yake wamesimama pembeni. “Kuna kitu nataka kukwambia baba.” “Naona unataka Masha atembee leo leo.” “Nimemtoa hapa acheze na watoto. Ric hataki hata kusogea mbali na baba yake.  Hataki kucheza wala kula mbali na baba yake. Amemganda baba yake kutwa nzima. Sijui anaona ataondoka tena na kumuacha? Angalau akikaa hapa, Ric akimuona atakuwa anacheza na mdogo wake.” “Ni vizuri.” Mzee Mwasha alimsalimia Masha kisha wakasogea na Bella, pembeni.

“Mwasha awa muwazi na kwa Bella.”
“Kuna nini?” “Nimekuudhi baba yangu?” Tayari machozi yalikuwa yakimtoka Bella. Mwasha alimuona vile alivyojawa na wasiwasi. “Kwa nini unafikiri hivyo, Bella mwanangu? Kuna nini?” “Ni vile ulivyotukuta na Vin. Naomba unisamehe.” “Siwezi kutokuwa muwazi kwako Bella. Ninakupenda sana mwanangu, na sitaki watu wakuchezee vile wanavyotaka wao. Naumia sana kuona watu wanakuwa huru na mwili wako.” Bella alijisikia vibaya sana. “Haruhusiwi mtu yeyote kukugusa Bella, mpaka awe amekabidhiwa na Mungu. Si sawa na wala si ruksa kukuchezea wewe kwa sababu yeyote ile.” Bella alibaki ameinama chini. “Unathamani kubwa sana mwanangu. Kubwa sana, ambayo ni mwanaume anayekupenda kwa dhati ndiye atakayekusubiri na kukuchukua ki halali, si kiholela. Najua umepita mahali pa gumu sana, kufika hapo ulipo. Lakini nina uhakika katika yote hayo, Mungu anakusudi na wewe mwanangu. Tena kusudi kubwa tu. Amekupa nafasi ya pili kwenye maisha, kufanya maamuzi sahihi. Tena ukiwa na watoto wako, na umezungukwa na watu tunaokupenda na kukujali ili usipotee tena. Namuomba Mungu akujalie hekima, ufanye maamuzi sahihi, tena ukiwa na mahusiano kamili na Mungu wako.” Mzee Mwasha aliongea sana na Bella, mpaka Bella akafunguka akili. Mwasha alimwambia hataweza kufanya chochote asipokuwa na uongozi wa Mungu ndani yake. Ndipo alipoamua kumuhubiria, mpaka Bella akaamua kuokoka. “Utakuwa unanifundisha mambo ya Mungu?” Bella alimuuliza kwa upole. “Unajua sisi hatukulelewa kwenye dini sana? Kwa hiyo sifahamu mambo mengi ya Mungu.” Mwasha alitabasamu. “Nitakuwa na wewe, katika kila hatua ya maisha yako Bella. Nitahakikisha unakuwa Kiroho na unafanya maamuzi sahihi. Nitakuombea na kukushauri endapo utahitaji msaada wangu.” Bella alikuwa akitokwa na machozi.

Alitaka kuongea kitu lakini Mwasha alimuona anasita. Akajaribu tena, akanyamaza. “Unaweza kuongea chochote na mimi Bella?” “Unafikiri ni sawa na kwa mama pia? Maana..” Bella alisita, lakini Mwasha alijua ni nini anachoongelea.  “Unajua wewe ni binti Mungu aliyenipa baada ya kukutafuta kwa muda mrefu sana. Nilikutafuta kwa maombi mpaka kwa madaktari. Lakini Mungu alikuleta kwangu kwa wakati wake. Ninakupenda Bella, kama mtoto niliyemzaa mimi mwenyewe. Naomba usije kusahau na kubadilika.” Bella alilia sana. Alitamani yale maneno yangekuwa yanatoka na kwa Mama Mwasha pia. “Umenielewa Bella?” Bella alishindwa hata kuitikia. “Ukibadili upendo wako kwangu kwa namna yeyote ile, ujue itaniathiri sana.” “Nakupenda sana baba yan...” Bella alisita. “Basi kama kweli unanipenda Bella, ujue upendo unanguvu sana. Unanguvu za kusamehe pia. Upendo una stahimili kila kitu na huwa hauhesabu mabaya. Mama yako alikosa. Na anajutia kila neno alilolisema siku ile. Mtapata muda naye na mtazungumza, lakini ujue na yeye anakupenda sana. Usiwahi kutilia mashaka hilo. Umeelewa Bella?” Bella alitingisha kichwa. “Natamani kukukumbatia!” “Zamani hukuwa ukiomba ruhusa kwa chochote ulichotaka kwangu. Naomba urudi kama zamani.” Bella alisimama na kumsogelea Mzee Mwasha, akamkumbatia. Alilia pale kwa muda, mpaka alipotulia. “Asante sana baba yangu.” Mwasha alifurahi sana. “Hapo umenifurahisha. Mimi sio Mzee Mwasha kwako, mimi ni Baba Bella. Usinipokonye tonge mdomoni.” Bella alicheka kisha akambusu shavuni. “Nimefurahi sana!” Waliendelea kuongea na Bella taratibu wakiwa mbali kidogo wanapocheza watoto.

*************************************************************

Huku kwa Elvin nako aliporudi na baba yake, akaingia ndani kumtafuta mama yake. Alimkuta amejipumzisha chumbani. Aliingia na kukaa kitandani. “Unajisikiaje?” “Vizuri. Nimeamua kujipumzisha tu.” “Nina kitu nataka kukuuliza. Lakini tutoke kwanza ukafanye mazoezi ya kutembea kabla hujalala moja kwa moja.” “Tutaongea saa ngapi bwana? Nitatembea hata kesho.” “Hapana mama. Kumbuka jinsi ulivyoshauriwa hospitalini. Twende tutazungumza huko huko njiani. Amka twende mama.” Mama Mwasha alijivuta, akavaa viatu vyake vya mazoezi wakatoka na Elvin. Wakiwa wapo nje kabisa wakitembea, Elvin alianza maswali. “Eti mama, huwa wananyonyesha kwa muda gani?” “Inategemea na maamuzi ya mama mwenyewe. Kuna wengine wananyonyesha mpaka miaka miwili na zaidi. Ila miezi ile sita ya mwanzo wanashauri mtoto kunyonya tu bila kula kitu chochote, kama tunavyofanya kwa Bella na mwanae.” “Miaka miwili? Haiwezekani.” “Kwani vipi?” “Nataka kumuoa Bella, mama.” Mama Mwasha alicheka. “Usicheke mama. Siwezi kumsubiri tena. Sitaki kuja kurudia kosa. Nahofia Masha asije akapona na kumchukua Bella.” “Naelewa jinsi ulivyomsubiria Bella. Lakini hudhani kama ni vizuri kumuona Bella akikuchagua wewe mbele ya Masha, kuliko kukimbilia kumuoa ili kumfanya Masha asikuwahi? Nafikiri sasa hivi unataka mwanamke utakaye kuja kuishi naye mpaka kifo Elvin.” “Ndiyo, ambaye ni Bella.” “Basi mpe nafasi Bella ya kufanya maamuzi yake. Mwache huru.Usimzonge kwenye maamuzi yake. Mpe nafasi ya kufanya maamuzi, akiwa hana msongamano wa mawazo kama sasa. Masha ni mgonjwa, yupo hapa na anamtegemea Bella kwa asilimia zote. Kama ni kweli Bella anakupenda, hata kama Masha atapona, atabaki kuwa na wewe. Hutaki uoe sasa hivi, halafu Masha akapona, Bella akataka kurudi kwa Masha. Utachanganyikiwa zaidi. Umenielewa?” “Nimeelewa mama.” “Lakini na wewe upo huru kufanya kile unachoona kinafaa kwako.” Elvin alikubaliana na mama yake akaamua kumpa Bella nafasi.

*************************************************************




Mambo yanazidi kuchanganya. Maisha yanazidi kurusha changamoto kwa Elvin na Bella. Elvin yupo huru, lakini Masha tena mgonjwa, anarudi kwenye maisha ya Bella, tena safari hii wakiwa na watoto wawili.






Usikose Sehemu ya 30 na nakala ya Kitabu cha "Endless Love". Wasiliana na namba hizo hapo juu au na mimi, utaletewa ulipo. Na kimefika mpaka mikoani