Google News - Top Stories

Healthy
Stories
Life-Style
COPY CODE SNIPPET

More News

*My Past* Sehemu ya 36.

*My Past*
Sehemu ya 36.
“Bella aanza maisha mapya mjini Virginia.”
Bella na familia yake waliondoka nchini Tanzania kuelekea nchini Marekani, mjini Virginia bila ya kumuaga mtu yeyote, tena wakisindikizwa na ulinzi mkali wa polisi. Kama kawaida yao Bwana na bibi Miller walikuwa uwanjani hapo na dereva kupokea familia hiyo. Masha alishawagusia ni nini kinaendelea tokea walipokuja kwa matibabu. Usaliti wote Matha na wanae waliomfanyia, na hatari ya kutaka kuangamizwa yeye na watoto wake nchini Tanzania. Kwa hiyo hata Miller aliafikiana na Masha kuwa nisalama kwake na watoto hao wadogo kuhamia nchini Marekani. Na alimuhakikishia kumsaidia kumtafutia uraia nchini humo.

Kwa kuwa Miller alikuwa akifanya biashara ya kuuza nyumba nchini Marekani, haikumsumbua au haikuchukua muda mrefu kwa Masha kupata nyumba nzuri na ya kifahari mjini Maryland. Miller alimshauri Masha kuanza maisha katika eneo la makazi ya watu wenye maisha mazuri au kipato kikubwa ili kupata shule zitakazo wafaa watoto na wahame pale kwenye eneo la utalii, mjini Virginia kwenye Condo yao na kupaacha pale paendelee kuwaingizia pesa. Ndipo akawauzia nyumba nzuri sana kwenye mtaa wa Burdette, mji wa Bethesda huko Maryland. Masha alinunua jumba hilo kwa ajili ya Bella, na kulipia pesa taslimu ya kimarekani million karibia 6.
Bella aliingia kwenye jumba hilo na kubaki ametoa macho. Kuanzia nje mpaka ndani, hapakuchosha kuangalia.


“Umepapenda?” Masha alimuuliza Bella. “Si itakuwa imekugarimu sana?” Bella aliuliza huku akizunguka ndani nan je ya jumba hilo bila kumaliza. “Hakuna garama kubwa kama garama uliyolipa ya kuacha kila kitu na kuambatana na mimi huku. Nitakupenda na kukutunza Bella. Nafanya kila kitu kwa ajili yako.”


Bella alimgeukia na kumtizama Masha, kisha akendelea kushangaa kila kitu mle ndani huku machozi yakimtoka, asijue mtu anawezaje kupenda kwa kiasi kile. Ni kweli kila alipokuwa akihusika Bella, Masha alimwaga mapesa yakutosha bila kufikiria. Alimpenda Bella bila unafiki na uzima wake hurudi wakati wote Bella anapokuwa wake. Jumba lilikuwa zuri sana.

Waliuziwa jumba hilo likiwa lina kila kitu ndani. Yaani ‘full fanished’. Kwa kuwa Bella aliridhika na kila kilichopo humo ndani, Masha akaona hakuna haja ya kupabadili. Alianza kutafuta wafanyakazi wakutunza nyumba hiyo, wakahamia na mizigo yao tu, maisha yakaanza. Hakuna siku kwenye jumba hilo ilipita Bella akiacha kumfikiria Elvin.

*********************************************************
“Hatimaye Ndoto za Masha zatimia.”
Kitu cha kwanza alichohakikisha anafanya kwa haraka baada ya kupata nyumba na kutulia, Masha alifunga ndoa na Bella tena ya kanisani. Hawakuwa na watu wengi waliohudhuria harusi yao zaidi ya familia ya Miller na watoto wao. Bella alivaa shela, akatoa viapo vyote kanisani, kuwa kifo ‘pekee ndicho kitawatenganisha’. Alitamani ingekuwa anaolewa na Elvin, lakini Masha alihakikisha yeye ndiye anaweka pete kidoleni kwa Bella na si vinginevyo. Ndoto za Masha zilitimia za kummiliki mtoto huyo kihalali. “Bella Masha.” Alimsikia Masha akirudia rudia kila wakati, nje na ndani ya kanisa huku akitoa tabasamu la ushindi. Pale Pale kanisani alitangaza kuwa Bella ndiye mke wake pekee na halali. Kulikuwa na wachukua video na wapiga picha. Masha alisema anataka kuweka kumbukumbu kwa watoto wake, ili wajue baba yao alimuoa mama yao, hakuwa akimchezea tu. Bella alikubali kila kitu kwa shingo upande bila kuonyesha kupinga huku akiumia sana rohoni.

Fungate la Masha na Bella.
Masha aliwaacha watoto wake kwa Bwana na bibi Miller wao wakaenda kwenye fungate lake na Bella kwenye visiwa vya Cayman, vilivyopo Amerika ya Kaskazini, Western Caribben Sea. Huko nako Masha alimwaga mapesa ya kutosha tu. Alitafuta hoteli nzuri sana, ambapo Bella alitumikiwa kama malkia. Kila siku walifuatwa na kufanyiwa masaji, wote wawili wakiwa wamejilaza sehemu nzuri, nje ya chumba chao. Walikwenda kwenye chumba cha Sauna pamoja, na kuzunguka ufukweni wakiwa wameshikana na kupeana mabusu ya mara kwa mara. Hakuna jinsi mtu angemuona Bella, akakubali kuwa ni Ennabella yule yatima, au ni mtoto aliyekuwa amezaliwa Tanzania akaishi uswahilini. Alizunguka ufukweni humo na nguo zake za ufukweni, akiwa ameacha sehemu kubwa ya mwili wake nje. Alifunika matiti na sehemu ya chini alijifunga mtandio mdogo sana na mwepesi, akiwa ndani amevaa chupi ya kuogelea tu, na kofia yake ya jua, na miwani. Masha naye alikuwa akivaa pensi za ufukweni na tisheti nyepesi nyeupe ili asiteseke na joto. Ni kweli Masha alionekana na furaha. Tabasamu lilimjaa usoni, na kila siku Bella alikuwa akimpima pressure asubuhi na usiku kabla ya kulala, ikawa imerudi kuwa ya kawaida kabisa. Sehemu pekee aliyotaka Bella alale ni kifuani kwake, ndipo na yeye aliweza kulala. Kila siku usiku waliongea na watoto wao kabla bi.Miller hajawalaza. Starehe hiyo ilidumu kwa muda wa siku tano mfululizo, lakini Masha hakufanikiwa kabisa kufanya mapenzi na Bella. Walihangaika kwa kila namna, mpaka wakakata wote tamaa na kuamua kurudi kumuona daktari wake Masha.

*********************************************************

“Sasa hizi picha nataka ziwafikie watu Tanzania.” Bella alishtuka sana. Mtu wa picha alikuwa ameleta picha zao za harusi nyumbani kwao. “Ili iweje T?” “Lazima kila mtu ajue umekuwa mke wangu wa halali Bella. Ili hata waliokuwa wakitegemea kuja kukuoa siku moja, wajue wewe ni Mama Masha sasa hivi. Na wakupe heshima kama mke wangu wa halali. Tena familia ya Mwasha ndio nataka wawe wa kwanza kupelekewa.” Bella alinyamaza kimya akimfikiria Elvin. Alijua kabisa Masha anataka kumuona au kusikia atakachosema, ndio maana aliamua kunyamaza.  Alimuonea sana huruma Elvin, asijue ni nini atafanya pale atakapopokea zile picha. Hapakuwa na mawasiliano kati ya wapenzi hao. Bella hakuwa na simu, na zile siku za mwanzoni, hakuweka kompyuta yeyote pale ndani. Alimsisitiza Bella haruhusiwi mawasiliano yeyote yale. Familia iliyokuwepo hapo ndani ndio ndugu pekee. “Naomba uniahidi hutanisaliti, Bella.” “Nikusaliti kivipi tena?” “Siku utakayowasiliana na mtu yeyote mbali na mimi, ujue umenisaliti. Ndugu yako ni mimi na watoto. Wengine wote ni wasaliti na ujue utawaponza. Sitaruhusu mtu yeyote anivunjie hii ndoa yangu. Nilifanya uzembe kwa Matha, lakini sio wewe Bella. Sitaki kuacha mwanya wowote kwako. Kuanzia sasa ni mimi na wewe tu kama ulivyoahidi mbele za Mungu na watoto. Na ujue ukifanya chochote kile kwa siri, nitajua. Si Tanzania tu, hata hapa. Na ukumbuke nilikuahidi kumuadhibu yeyote atakayenitenga na wewe. Unanielewa?” Bella alitamani kulia. Alijua baada ya kukubali ndoa, basi yupo huru. Alipanga kumtafuta Mzee Mwasha, amsimulie kila kitu, na amuombe awaombe radhi watoto wake na mkewe kwa niaba yake. “Bella?” Masha alimwita. “Nimeelewa, Masha.” “Basi naomba ujichunge sana.” Bella alinyamaza.

Masha hakuwa anatania, alizituma zile picha kwa email kwa mmoja ya vijana wake nchini Tanzania, na kumwambia azi print na kuzifikisha zile picha nyumbani kwa Mwasha na ahakikishe Zera anazipata ili Mama yake na Junior wakitoka hospitalini wazipate pia. Bella alilia sana. Alilia asijue ni kwa jinsi gani atasaidi kupunguza machungu kwa Elvin.

“Masha aanza biashara.”
Kwa kuwa alipata anachokitaka wala hakuhitaji matibabu mengi, hali ya Masha ikaanza kuwa nzuri kitu kilichomshangaza hata daktari wake. Waliwaanzisha watoto shule, maisha yakaanza rasmi. Masha alikuwa na akili sana. Ni wale watu ambao hata ungewatupa jagwani wangeishi tu. Kwa muda mfupi alioishi pale nchini Marekani, alifikiria biashara yakufanya. Aliangalia uhitaji mkubwa uliopo pale nchini, na kutafuta kujua pesa nyingi wapi serikali ya Marekani inapeleka, akapata jibu kwa wazee, yaani wastaafu wao. Bila kupoteza muda, aliweka pesa yake yote kwenye biashara ya kuuza “Mobility Product.” Bella alipatwa na wasiwasi sana, kwa kuwa Masha alichukua karibia ile pesa yote aliyosema ni ya watoto na kutumbukiza kwenye biashara. “Hujajua kitu Bella, mke wangu. Hii nchi inapenda sana wafanya biashara. Wakishaona tunawaingizia pesa nyingi, watatupa uraia bila shida. Na watoto wetu watasoma hapa vizuri sana.” Bella alikubali kwa shingo upande. “Usiogope. Nimefanya utafiti wa kutosha, najua itatulipa tu. Baada ya muda mfupi maisha yetu yatabadilika sana.” “Zaidi ya hapa?” Bella aliliza nakumfanya Masha acheke. “Hapa bado Bella. Nataka uje kuwa miongoni mwa wanawake matajiri duniani.” Bella alianza kucheka. “Huamini?” Masha aliuliza. “Hapa tu najiona milionea. Natamani Eric angekuwepo ili na yeye apumzike. Tuliteseka sana.” “Pole Bella. Mungu amekupa Eric mwingine. Hakikisha unatuliza mawazo ili afaidi.” “Nitatulia T. Nimekuchagua wewe, nakuahidi sitabadilika wala kukuumiza. Usiwe na wasiwasi. Ni mimi, wewe na watoto wetu tu.” Alimuona vile Masha alivyofurahi. “Asante Bella. Nakushukuru mke wangu.” Bella alimbusu.

*********************************************************

Aliagiza vitu kama Wheelchairs, walkers, Canes and stair assists kwa ajili ya wazee, na walemavu. Aliagiza kutoka nchini China kwa bei nafuu na vyenye ubora mzuri, akavileta Marekani. Hapo alisha zunguka kwenye mahospitali na sehemu wanazotunza wazee, kutafuta masoko akisaidiwa na Miller. Kwa hiyo muda mzigo wake unafika, alishapata soko la mzigo karibia wote. Bella alimshangaa sana Masha. “Hongera, T.” Masha alicheka.

Ndani ya miaka miwili wakiwa nchini humo, Masha na Bella walistawi sana. Waliweza kuwa na pesa za  Marekani million 50, taslimu, zilizowapelekea kuangukia kwenye green card’ aina ya “EB-5 immigrant investors”, kwani waliweza kufungua kampuni kubwa iliyoweza kuajiri si tu wamarekani 10 kama sheria ya Visa hiyo ilivyohitaji, bali Masha aliajiri wamarekani zaidi ya 10, na mwanasheria ambaye alisimamia sheria zote kufuatwa kwenye kampuni hiyo huku akimlipa mshahara mkubwa na marupurupu mengine. Alikuwa na vitengo mbali mbali kuanzia watafutaji masoko, wanasheria, stoo, wahasibu na kadhalika. Kiwango cha pesa kilichohitajika na wamarekani ili kukupa aina hiyo ya Green Card ya wageni wafanya biashara ilitaka angalau uwe na milioni 1 ya kimarekani, lakini Masha aliendeleza kuzalisha na kuwekeza kama mchwa. Kichwa chake kilikuwa kikifanya kazi vizuri sana.

 *********************************************************

Bella alitaka kurudi shule kusomea mambo yake ya IT kwa ngazi ya juu zaidi. Masha akahakikisha anamrudisha Bella shule na anapata Elimu anayotaka yeye. Walijulikana na matajiri wa nchini humo. Wakawa gumzo nchini kwa kuwa walikuwa wageni waliofika nchini Marekani na kufanikiwa kihalali bila dhuluma na waliendesha mambo yao kihalali. Miller aliwasaidia sana kuwafundisha mbinu za kuendeleza biashara nchini humo huku akiwasisitiza kuhakikisha wanalipa kodi kihalali na kuweka mahesabu yao vizuri bila kuficha, ili wasiingie matatizoni. Kwa hiyo kila uchunguzi ulipokuwa ukipita kwenye kampuni hiyo ya Masha, hapakuwa na kosa.

*********************************************************

Japokuwa waliishi kwenye jumba hilo la kifahari na maisha yakifahari sana, nchini Marekani na Bella alikuwa akibadilisha magari ya thamani kila mara, lakini hakuwa na furaha  hata kidogo moyoni mwake. Alijitahidi kufanya nyumba yake iwe ya amani, ili watoto wao wakue vizuri na angalau kumuonyesha Masha anathamini anachomfanyia. Na kweli nyumbani kwa Bella palikuwa patulivu sana. Si wafanyakazi wao tu walio pafurahia nyumbani kwa Bella, hata Masha mwenyewe alikiri kuwa ndiyo maisha alikuwa akiyatamani kuja kuishi kabla ya kufa. Upendo na amani ulitawala ndani ya nyumba yao.

Bella alipomaliza shule hakutafuta kazi, akabaki akilea watoto. Yeye ndiye aliwapeleka na kuwarudisha shule huku akisimamia mambo yote ya watoto wakati Masha anahangaika na biashara. Watoto wake walisoma shule za matajiri na kuishi kama watoto wa mfalme hapo nchini. Tito ndiye alikuwa na tabia kama za baba yake kabisa. Bella alikuwa akimwangalia na kumuhurumia sana mtoto wake, lakini Ric alikuwa mtoto mpole na mnyenyekevu sana. Shuleni waligundua kipaji kikubwa cha michezo ndani ya Ric. Walimshauri Bella ambaye ndiye alikuwa akisimamia mambo ya shule ya watoto, kuwa Ric lazima aendelezwe kwenye huo mchezo. Kocha wa michezo hiyo aliomba kuongea na Bella juu ya Ric. Akamueleza kipaji kikubwa alichokiona ndani ya mtoto huyo, na kumuomba Bella, amkabidhi yeye yule mtoto, atamkuza katika kipaji hicho.

Bella alizungumza na Masha, akamueleza ndivyo alivyokuwa hata marehemu mdogo wake Eric, na kumuomba wampe huyo kocha nafasi ya kumkuza Ric kwenye upande wa michezo. Masha hakumkatalia Bella, akampa ruhusa yakufanya kile anachoona kitamfaa mtoto wao, hata hivyo baada ya mazungumzo mafupi kati ya Masha na huyo kocha, Masha mwenyewe alimpenda yule kocha, kwani kocha huyo alionekana pia ni mcha Mungu. Akaanza kazi ya kumfundisha Ric. Kwa kuwa nyumba yao ilikuwa kubwa na viwanja vingi vya kucheza, Masha alikuwa akimlipa pesa nyingi sana yule kocha, ili kufika nyumbani hapo na kumfundisha Ric peke yake. Na maisha yakaendelea bila shida.

Huku nyuma nchini Tanzania.
Ilishapita miezi miwili bila mawasiliano yeyote kati ya Elvin na Bella. Lakini Elvin alijifariji akijua ni ukimya wa muda tu, Bella atakaporudi watafunga ndoa. Kaka hao walikamilisha taratibu zote za harusi, ndipo na Elvin akatafuta tena pete nyingine ya kumvalisha Bella pindi atakaporudi, kabla ya harusi yao. Kwa kuwa hawakujua ni lini anarudi, hata kadi za kukaribisha watu kwenye harusi hazikuwa zimetengenezwa, wakisubiri Bella arudi ili taratibu nyingine ziendelee.

Ilikuwa siku ya Jumapili familia hiyo ya Mwasha walipokuwa wametoka kanisani wote wapo mezani wakila, ndipo dereva wa Masha alipoingia na kuwapa ile bahasha, iliyobadili maisha ya Elvin papohapo. Ni kama pepo mchafu alimuingia na kubadili ule utakatifu wote wa Elvin. Bella alikuwa msaliti mkubwa sana kwa familia ya Mwasha. Aliamsha hasira kali sana kwa familia hiyo. Hakuna aliyeamini baada ya kuona picha zao za harusi. Bella alionekana na furaha zote akiwa kanisani na nje ya kanisa, hapakuwa na dalili kuwa alilazimishwa kuolewa. Kile kitendo kilimuumiza sana Mama Mwasha. Alijiuliza ni wapi alipomkosea Mungu lakini hakupata jibu. Watoto wake wakiume wawili Eli na Eno, waligoma kuoa kabisa na hao wawili JJ na Elvin, walioonyesha nia ya kuoa ndoa zao zimekuwa ngumu. Tena ndio watoto walionekana wasikivu na wacha Mungu, lakini ni kama hawakubahatisha kupendwa kabisa.
JJ na Diva.
JJ alishindwa kabisa kumrudisha Diva, mkewe nyumbani. Diva alioomba msamaha na kumuhakikishia mumewe amebadilika lakini JJ alishindwa kabisa kumpokea mkewe kitu kilichomchanganya kila mtu. Mkewe alijaribu kumchunguza mumewe kama amepata mwanamke mwingine, lakini hakupata uhakika. Alibaki akihisi tu. Diva msichana msomi tena mwenye uelewa wa maisha, aliwashangaza hata wazazi wake ambao walimshauri aolewe na mtu mwingine maisha yaendelee kuliko anavyojichosha kwa kumbembeleza JJ.

*********************************************************

Siku hiyo alirudi nyumbani akiwa analia. Akapitiliza chumbani bila kusalimia wazazi wake waliokuwa mezani wakila chakula. Walimsikia akilia kwa uchungu sana chumbani kwake. Baba yake alizidi kuumia akajua lazima ni mambo yake na JJ. Mama yake akaamua kumfuata huko chumbani kwake. “Pole sana Diva.” “Naona leo ndio mwisho wangu na JJ, mama. Amenigombesha na kunitukana kama mtoto mdogo. Anasema anajuta hata kwa nini alizaa na mimi.” Mama yake aliumia sana. Hakutaka hata kujua sababu tena. Vilio vya Diva vilikuwa ni vya mara kwa mara, na vyote alivisababisha JJ. “Mbona Justin ni kijana mzuri tu. Na anaonekana ametulia. Nashauri uendelee na maisha yako Diva. Achana na JJ. Anakupotezea muda. Utaishi humu ndani mpaka lini? Kwanza Justin anapesa kuliko hata huyo JJ.” “Hakuna mwanaume anayeweza kunivumilia na kunipenda kama JJ, mama. JJ amenivumilia tokea tuko shuleni. Nilimsumbua sana na bado alinioa.” “Sasa yuko wapi huyo JJ? Labda ndio amefika mwisho. Ni miaka miangapi tokea mtengane? Kama angekuwa anakupenda kweli si angekusamehe? Nashauri uachane naye Diva. Ushajidhalilisha vyakutosha. Unazunguka huko makanisani kuombewa kama mwendawazimu! Kama kweli ungekuwa na hayo mapepo na una mkosi, basi vingeshatoka. Huna mkosi Diva mwanangu. JJ sio mumeo.” “Unaongea nini mama jamani? Unataka niachane na ndoa yangu, nikaolewe tena!? Watoto wangu je? Kwanza umesahau wewe mwenyewe ulishanionya jinsi ninavyoishi na JJ, lakini sikukusikiliza? Sikuwahi kumpenda wala kumuheshimu JJ, katika maisha yetu yote yamahusiano. Yeye ndio amekuwa mtu wakuhangaika na mimi bila kuchoka.” “Basi ndio ameshachoka. Ukubali ukatae, JJ hatakurudia tena.” “Inawezekana mama, wala sikatai. Kwa kuwa ni kweli hana kitakachomfanya ajirudi kwangu. Hakuna kitu kizuri anachoweza kukikumbuka kwangu na kumfanya anirudishe nyumbani. Lakini naamini Mungu atasaidia.” “Mungu wa kanisa gani Diva wewe? Hebu niambie umehama makanisa mangapi kwa ajili ya huyo JJ? Umekuwa kama mwehu! Unawekewa mikono na kila mchungaji! Hebu acha maisha yaendelee bwana. Huna raha hata na pesa yako! Maisha yako yamekuwa ni kazini- nyumbani, nyumbani – kanisani. Tena wakati mwingine unalala huko huko eti mkesha! Watu wote wanatucheka sisi, wanasema umechanganyikiwa! Unatutia aibu, Diva. Hivyo sivyo tulivyokulea bwana. Kama swala la watoto, mbona huwa anakuletea hapa hao watoto! Basi hata ukiolewa, atakuletea hao watoto huko huko. Kwanza watoto wenyewe wameshakuwa wakubwa, wanaweza kujitegemea. JJ, JJ, kwa uJJ gani bwana!? Na hivi wamempandisha cheo, ndio kabisaa, atakuona wewe hufai. Achana naye maisha yaendelee. Watu wanakusema unazidi kumng’ang’ania sasa hivi, sababu ya kupandishwa cheo na anapesa. Na yeye anazidi kupata jeuri. Kwa pesa gani bwana? Tushaona wenye mapesa, na mifano unao!” Diva alinyamaza kimya.

“Au fanya kama alivyosema baba yako. Jipe muda hata wa mwaka mmoja. Nenda kasome huko nchini Uingereza kwa huo mwaka mmoja. Rudi uone atakwambia nini huyo JJ. Akiwa bado anashindwa kukusamehe, basi muombe talaka, maisha yaendelee. Kwani ni wangapi wametoka nje ya ndoa na wamesamehewa bwana! Wewe sio wa kwanza, Diva na wala hutakuwa wa mwisho. Kama hataki, basi.” Kidogo yale maneno yalimuingia Diva.

*******************************************************

Baada ya kuhangaika kwa muda mrefu kubembeleza mumewe amsamehe na kukataa, alibadilika akawa kama aliyechanganyikiwa. Kila mtumishi wa Mungu aliyeambiwa anauwezo wa kufanya miujiza, Diva alikwenda. Hata mikoani alifika kuombea ndoa yake. Tena kwa kutubu na kulia. Lakini kila aliporudi kwa JJ, alimkataa. Alimpelekea watoto pale alipoweza, na kurudi kuwachukua jioni yake. Au kama ikitokea anasafiri, aliwapeleka kwa Diva, mama yao kwa kipindi hicho akiwa safarini au kwa mama yake, Mama Mwasha. JJ alikuwa ni kijana asiye na marafiki wengi na mtu wa familia sana. Kwa hiyo muda mwingi aliutumia kazini na nyumbani kwake na watoto wake. Siku za jumamosi na jumapili ambapo haendi kazini alihamia na wanae nyumbani kwao kwa wazazi wake, na kurudi usiku kulala nyumbani kwake. Kama alitaka kutoka kwenda sehemu ya starehe, aliwachukua wazazi wake, hasa mama yake na wanae, na kwenda nao kutembea hizo siku ambazo haendi kazini, lakini sio na Diva tena.

*******************************************************

 Ushauri wa mama yake ulimuingia vizuri sana. Hata yeye akaona inatosha kuhangaika na JJ. Alijua wazi JJ hawezi kumsamehe tena. Hakuwa na sababu yakufanya hivyo. Alikumbuka jinsi alivyokuwa akimuendesha mumewe kama gari bovu. Hata tendo la ndoa alimpa kwa mgao. Mara nyingi kila alipomtaka kimapenzi, alimwambia alikuwa ana mambo mengi sana ofisini, amechoka anataka kupumzika. Na hata alipomkubalia, alimkosoa hili au lile. Mara amuulize kama alipiga mswaki usiku huo baada ya kula, au alimwambia sehemu za ndevu zinanuka jasho, labda hakujisugua vizuri wakati anaoga, kwa hiyo arudi bafuni kujisafisha tena ili kufanikisha tendo la ndoa usiku huo, na pengine aliambiwa kuna harufu mbaya kinywani, Diva asingeweza kukiss kwa wakati huo, na wakati huo huo ambapo JJ yupo kitandani hapo akiomba tendo la ndoa, alianza kutoa ushauri tena kwa manyanyaso akimtaka kesho yake akamuone daktari wa meno au atafute dawa fulani ya kuua harufu mbaya mdomoni. Au wakati mwingine alipotoka kujisafisha kama alivyotumwa na Diva katikati ya tendo la ndoa, alimkuta mkewe alishalala, au alimwambia waendelee kesho, amechelewa sana bafuni, yeye ameanza kusinzia. Kwa hiyo hata mapenzi yenyewe kati yao hayakuwa mazito kwa muda wote huo wamahusiano yao. Kila Diva alivyowaza baada ya mama yake kuzungumza naye, aliona ni kweli JJ anahaki zote zakumkatalia. Alikumbuka siku alizokuwa akimuomba hata wakapumzike mahali kwa siku mbili, lakini alimkatalia akitunga safari na kuishia kwenda kujifungia hotelini na hawara yake.

*******************************************************

Alitoka pale chumbani na kumfuata baba yake. “Vipi Diva?” “Samahani baba, hivi ile nafasi yakunisomesha bado ipo?” Baba yake alizima tv, akamgeukia mwanae vizuri. Alikuwa amestaafu, akalipwa pesa nyingi kama mafao yake. Walipoona mtoto wao anazunguka kama mwendawazimu akitafuta kurudiana na mumewe, huku marafiki wakiwacheka, akaamua kumshauri Diva, atoke nje ya nchi kwenda masomoni. Diva alijaliwa akili nzuri sana za darasani. Kwa hiyo baba yake alitamani atoke, arudi shule, mbali na JJ, labda atajikumbuka kuwa yeye ni Diva, mwanamke aliyejaliwa vitu vingi ambavyo wanawake wengi wanavitamani na kuendelea na maisha yake kuliko vile anavyojiliza na JJ, mwanaume aliyeonyesha na kutamka wazi hamtaki tena.

“Umeamua kurudi shule?” Baba yake aliuliza. “Naona nijipe muda na kumpa hata JJ nafasi, kuliko hivi ninavyomfuata nyuma mara kwa mara.” Baba yake alimuhurumia sana Diva. “Nilikosea baba.” Diva alianza kulia tena. “Wote tunakosa Diva.” “Lakini mimi nimekosa na kupoteza maana nzima ya maisha. Ona kazi niliyonayo, na pesa ninayoingiza. Naheshimiwa na kila mtu kasoro mume wangu na watoto. Siku hizi hata watoto wenyewe hawanitaki. Wanakataa kuja huku kwangu, wanataka kukuaa na baba yao tu. Sina amani baba. Hao watoto ndio tumaini pekee nililokuwa nimebakiwa nalo. Na wenyewe wameanza kunikataa.” “Kweli unahitaji muda wa kupumzika Diva. Lakini nakuhakikishia, watoto wako ni wako tu, hata iweje. Hawawezi kukugeuka. Wape muda. Pesa yako ya shule bado ipo vile vile.” Shida ya mzee huyo ni Diva aondoke hapo nchini hata na wao wapumzike. “Asante baba. Basi nitaanza kufuatilia tena mambo ya chuoni, na hii akiba yangu itanisaidia jinsi ya kuishi huko. Lakini nimekusudia kuondoka.”

·        Diva alifuatilia chuo huko nchini Uingereza akakuta kile cha mwanzoni alishachelewa, walishafunga maombi. Akatuma maombi kwenye chuo kingine cha ‘Bristol University’ kilichokuwepo huko huko nchini Uingereza. Kwa kuwa alikuwa na bank statement nzuri ya kwake na baba yake, hakusumbuka kupata chuo na Visa. Alikuwa kimya kwa muda kidogo akijiandaa na safari yake. Kwa hiyo hakuwa akimsumbua JJ wala watoto wake tena. JJ alishangaa siku zinakwenda bila kumsikia Diva. Lakini nalo hilo alilipuuza.

*******************************************************

Ukweli Diva alibadilika kitabia. Akaamua kwenda kuomba radhi kwa wazazi wa JJ kabla hajaondoka nchini. Alimwandikia barua ndefu sana mumewe, akaamua kwenda kuiacha nyumbani kwa wazazi wake alipojua JJ lazima ataipata tu. Alitamani angempa JJ mwenyewe lakini JJ alimwambia asithubutu hata kumpigia tena simu mpaka atakapomtafuta yeye mwenyewe, tena hapo ni baada ya kumtukana sana mkewe.

Alifika nyumbani kwa Mwasha ilikuwa jioni ya siku hiyo ya ijumaa. Alimkuta Mwasha amekaa nje, akiwa peke yake. “Karibu mama.” Mwasha alimkaribisha. “Asante baba yangu.” Diva alimsalimia kwa kumshika mkono. “Mbona upo peke yako?” Diva aliuliza. “JJ amekuja kumchukua mama yake hapa, ametoka naye. Si unajua afya yake bado inamsumbua? Ndio wanajaribu kumtoa humu ndani ili akapoteze mawazo huko nje.” “Sasa mbona na wewe hukwenda?” Diva aliuliza tena. “Nipo kwenye maombi mama. Nataka muda mtulivu na Mungu. Haya, kwema huko?” Mzee Mwasha aliuliza, Diva akatulia kidogo.

“Sijui niseme nini baba, lakini nimekuja kuomba msamaha.” Diva alianza kulia. “Diva mwanangu! Msamaha huo unaomba mara ngapi? Kila siku unaomba msamaha! Mimi na mama yako tulishasamehe kabisa. Uwe na amani.” Diva alifuta machozi. “Nashukuru wazazi wangu. Basi naomba baada ya mwezi huu kuisha, umpe JJ hii barua. Itunze tu mpaka huo muda. Na ninaomba uniagie mama.” “Unakwenda wapi?” “Nahisi nitachanganyikiwa baba. Nimeamua kuondoka, nikasome nchini Uingereza, japo kwa mwaka mmoja tu.” “Unamwachia nani mumeo?” Mwasha alimuuliza taratibu. “JJ?” Diva aliuliza na kujisuta tena maana Mwasha alibaki akimtizama.

“Nilimkosea sana JJ. Ameshindwa kunisamehe kabisa. Mazungumzo yetu ya mwisho hayakuwa mazuri. JJ hanitaki tena, na ameomba nisimtafute tena, mpaka yeye anitafute. Tokea aniambie hivyo, nakaribia mwezi sasa, sijamsikia tena. Na kila nikiwapigia watoto simu nikiwaomba waje kuniona, wananikatalia. Nimebaki kama nimechanganyikiwa baba.” “Nini kilichosababisha ugomvi wa mwisho?” Diva alivuta pumzi kwa nguvu akajaribu kutulia.

“Kule nilipohamia kikazi, CEO aliacha kazi. Wakatafuta mtu mwingine mwenye sifa kama hizo. Yule bosi wangu wa zamani akatuma maombi hapo, aka..” “Yule uliyekuwa na mahusiano naye?” Mwasha alimkatiza kwa kuuliza swali, Diva aliinama na kujibu kwa unyonge. “Ndiyo.” “Ehe?” “Akapata kazi hapo. Sasa unajua hapa mjini kwenye swala la kazi ni padogo sana. Watu wenye vyeo kama hivyo, kwenye haya makampuni makubwa, wanajuana. Kwa hiyo habari zikasambaa zikamfikia JJ. Huyo aliyemtumia ujumbe akamwambia ‘Umesikia mume mwenzio amekufikia cheo?’ Na maneno mengine mengi kama kumkashifu JJ. JJ akanitumia na mimi ule ujumbe, akasema nilikuwa namficha kuwa mume wangu ameamua kunifuata kwenye kampuni hiyo niliyohamia. Nikampigia JJ mara kadhaa hakupokea. Lakini nia ni kutaka kumwambia hayo ni maisha niliyoishi zamani. Nimeokoka na nimebadilika. Sijui nikuchanganyikiwa vipi baba yangu, baada ya kumtafuta karibia siku nzima, nikimpigia hapokei, ile simu nikaisahau kazini. Nimefika nyumbani hali yangu ikawa mbaya kwa mawazo. Nimeumwa tumbo la kuharisha usiku kucha kwa wasiwasi, nikashindwa kwenda kazini kesho yake. Dady akaamua kunipeleka hospitali, wakati natoka hiyo siku inayofuata, nikamuomba dady tupitie ofisini kwangu nikafuate simu. Dady akakubali. Lakini nilifika nikakuta imeishiwa charge na nina kazi natakiwa kuzimalizia siku hiyo. Nikamuomba dady aniache, nikamwambia nitachukua taksii nikimaliza kazi zangu. Jioni ilikuwa imeshaingia baba yangu. Mpaka simu kuingia umeme,  na mimi nilikuwa nina kazi nyingi pale kwenye meza yangu, ilishakuwa usiku. Nikaamua kuiwasha, ndipo nikakutana na missed calls za JJ. Nikamrudishia simu, lakini hakupokea. Nikamtumia ujumbe, kumuomba niende nyumbani tuonane ili nizungumze naye.. Akajibu yeye hayupo nyumbani yupo kazini kwake. Nikamwambia kwa kuwa na mimi bado nipo ofisini kwangu, basi naomba  nimfuate ofisini kwake ili nizungumze naye hata kwa dakika 5 tu, akasema yeye ndio anatoka kazini. Nikamuomba anipitie pale ofisini kwa kuwa sikuwa na usafiri. Akaa muda mrefu ndio akanipigia simu, akaniambia nimsubirie chini kabisa, nje ya ofisini kama baada ya dakika 5 atakuwa amefika. Akasema hataki kuingia ndani kwa kuwa yeye amechoka kudhalilika hapa mjini, hataki kukutana na mabwana zangu wa pale ofisini. Nishamdhalilisha vyakutosha, hataki kuendelea kujidhalilisha zaidi. Akakata simu. Ili nisimchelewe, nikawahi kushuka chini.” Diva akaanza kulia.

“Sijui nina mkosi gani baba yangu! Yaani yule bosi wangu tokea anaanza kazi pale kwenye ile kampuni sikuwahi kukutana naye, yaani siku hiyo mimi namsubiri JJ eti na yeye ndio anashuka kutoka kwenye lifti, ananiona na kunifuata kunisalimia. Wakati tu ananisalimia na kunipa mkono, na JJ naye anatokea. Hakuwa amepata nafasi ya kuegesha gari pale mbele ya ofisi, akapata mbali kidogo, sasa akawa ndio amenifuata kuja kunichukua ili nisitembee peke yangu mpaka alipo na usiku ule. JJ alisimama akituangalia pale na yule bosi, mimi nilimuona lakini yule bosi hakuwa amemuona. JJ akageuza na kuondoka bila hata kusalimia. Baada ya yule bosi kusalimia, hata hakusimama pale muda mrefu kwa kuwa alikuwa na wenzake, akaondoka. Nikampigia simu JJ. Baba!” Diva alikwama, akainama na kuzidi kulia kwa uchungu sana“JJ alikuwa kwenye hali mbaya sana. Hakunipa hata nafasi ya kuongea. Alinitukana sana, na kuniambia siku nitakayompigia simu na kwenda nyumbani, ndio siku atanipeleka ustawi wa jamii kuwaonyesha ushahidi wote wa siku na hoteli nilizokuwa ninalala na huyo mwanaume, na kuwaambia mimi ni mama ambaye sifai kuwa karibu na watoto wangu, ni mchafu kimaadili, sifai kuwa hata karibu na watoto wake. Na huo ndio utakuwa mwisho na wanangu.” Masha alivuta pumzi kwa nguvu na kuzishusha.

“Hakuna tena tumaini baba. Nimemuumiza sana JJ, hawezi kuniamini wala kunisamehe tena maishani.” “Mbona ni kama nilikusikia ukisema umeokoka?” “Nimeokoka baba, lakini nimeshindwa. Nimezunguka kuombea hiyo ndoa mpaka nimechoka. Kila kanisa nimeingia kwa ajili ya kuombewa kama nina mkosi au majini yanitoke, JJ anisamehe. Lakini sijafanikiwa.” “Ngoja kwanza Diva. Mbona unachanganya mambo hapo? Wokovu ulionao ni kwa ajili ya ndoa yako?” Mwasha aliuliza swali lililomfanya Diva afikirie kidogo. “Nilitaka kuombewa baba. Sasa ilibidi kuokoka, nitubu dhambi zote ili Mungu asikie maombi yangu.” “Diva mwanangu, sijui nani alikwambia hivyo lakini sidhani kama umeelewa swala zima la wokovu. Huokoki ili matatizo yako yaondoke. Unasoma bibilia lakini?” “Nimekuwa na mambo mengi baba. Akili haijatulia hata muda wa kusoma bibilia sina.” Mwasha alijiweka sawa.

“Nisubiri kwanza hapa nje nakuja.” Mwasha aliingia ndani akarudi na bibilia. Akaanza kumtembeza Diva kwenye maandiko na kumuacha Diva akiwa amechoka kabisa. “Sikuwa nimeelewa hivyo baba yangu. Nahisi nilifanya kwa kuchanganyikiwa nikiwa nataka Mungu anirudishie mume wangu tu wala si mimi kuwa na mahusiano na huyo Mungu.” Mwasha alitabasamu akajua kule kusukumwa na roho wa Mungu kubaki pale nyumbani asitoke na mkewe na JJ kwenda kwa chakula cha usiku ni kwa ajili ya Diva. Baada ya kumuelewesha kwa muda mrefu mpaka Diva akaelewa, ndipo alipoomba Mzee Mwasha amuongoze sala ya toba tena.

*******************************************************

“Unasema umejaribu kila uwezalo kuokoa ndoa yako lakini umeshindwa, umeamua kuondoka?” “Hamna nilichobakiza baba.” Mwasha alicheka. “Usinicheke baba yangu. Nimejaribu kila kitu kwa JJ, nimefika mwisho.” “Unajua umekuwa ni kama mvuvi anayeenda kuvua samaki porini badala ya majini.” Diva alitulia kidogo. “Unakomtafuta mumeo huko sipo. Ngoja nikupe siri ambayo naona wewe bado hujaifahamu.”

*******************************************************
Hatimaye Masha ameibuka mshindi. Juhudi zake zimempatia Bella. Amemfikisha kanisani, na sasa hivi ni Mama Masha kihalali, kitu kilichomtoa kanisani mpenzi wake, aliyeona kwa mara nyingine amesalitiwa vibaya sana. Elvin alikuwa kijana mcha Mungu toka utoto. Amejitunza na kumuheshimu Mungu wake bila kuchoka, lakini bado mabaya yameendelea kumfuata, ameamua kuachana na Mungu kabisaa. Usikose kujua maisha mapya ya Elvin ambaye hajui ukweli juu ya Bella ambaye amezuiwa kuwasaliana kabisa na familia ya Mwasha. Masha amemuonya asiwahi hata kuthubutu kuwatafuta, kwani huo ndio utakuwa mwisho wa familia hiyo ya Mwasha.
Baada yakumsumbua mumewe kwa muda mrefu sana, JJ akihangaika na ndoa yake, akaamua kumuacha Diva. Sasa Diva akapata uhuru wote, akapata mafanikio mazuri, lakini gafla kila kitu kinakosa maana sababu ya kumpoteza JJ. Amehangaika mpaka amechoka na kukata tamaa. Lakini kumbe Mzee wa Busara, Mzee Mwasha, anayo siri kubwa sana. Je, ni ipi siri hiyo?

Usikose Sehemu ya 37, kujua mwendelezo wa Diva na mumewe, maisha ya Elvin, na Bella akiwa mke halali wa Masha.

*My Past* Sehemu ya 35.

*My Past*
Sehemu ya 35.
Bella akaamua kurudia kumpigia simu, Masha. Ikaita tena kama mara tano ndipo Masha akapokea. “Naomba urudi nyumbani tuzungumze. Tafadhali Masha. Kama kweli unanipenda au ulishawahi kunipenda na unataka kuwa na mimi na hawa watoto, utarudi nyumbani. Sasa hivi. Polisi wamemwagwa mji mzima wanamtafuta Matha. Nakuhitaji Masha. Tafadhali rudi nyumbani.” Masha alikuwa kimya kabisa upande wa pili. Bella aliita. “Masha!” Kimya. Aliitazama simu yake kutaka kujua kama ameshakata, lakini akaona bado. Kwa hiyo akajua Masha anamsikiliza. “Na ni kweli pesa yako haiwezi kununua kila kitu Masha, lakini mapenzi ya dhati yanaweza kukupa unachotaka.” Bella akakata simu. Alijua Masha atarudi tu.


 “Bella aamua kujitoa kafara kuokoa Maisha ya awapendao.”
Bella alitoka pale chumbani, na kuwalipa wale wasichana wa kazi mshahara wao na kuwaambia waondoke, wasirudi mpaka atakapowapigia tena simu kama atawahitaji. Mwisho wa mwezi haukuwa umefika, lakini Bella aliwalipa mshahara wao wote, wa mwezi mzima. Walifurahi sana na kumshukuru Bella, huku wakimsihi asije kutafuta watu wengine wa kazi, wao wapo tayari kurudi wakati wowote. Bella aliwaaga na zawadi baadhi huku akiwashukuru sana, kwa uvumilivu. Yule aliyekuwa akimuhudumia Masha, kwa ugumu aliokuwa akipambana nao wakati wa kumuuguza Masha na yule nesi wa Tito kwa shida alizokuwa akizipata na mtoto wake. Tito alikuwa akimng’ata sana kila anapomgusa. Ilikuwa ni heri amwekee chakula chini ale mwenyewe kuliko ampakate mlishe. Wakati mwingine hakutaka hata awe karibu yake wakati wa kula. Yule dada mwanzoni hakuwa akielewa, kwa hiyo alipokuwa akikaa karibu yake wakati Tito anakula, Tito alimwaga chakula, mpaka Bella alipogundua, kwa kuwa aliishi na Tito mkubwa, Masha, kwa hiyo alijua hizo tabia vizuri sana. Tito alijifunza kujitegemea akiwa mtoto mdogo sana. Mara kadhaa Bella alishampeleka kanisani akaombewe, ili roho ya ukatili, dharau na kinyaa kama ya baba yake imtoke. Na akiamka siku hiyo hataki kuguswa na mtu yeyote yule, ilimbidi Bella awe anafanya kazi zote yeye mwenyewe. Watu aliokubali wamguse ni Bella mama yake, Ric na Elvin. Baba yake mwenyewe ilikuwa ni heri waangaliane kwa mbali tena mama yake akiwepo, lakini asimguse. Nesi wake aliyekuwa akimlea yeye alikuwa akimshika kwa masharti na kwa siku alizoamka vizuri.

*******************************************************

Wale wafanyakazi walipoondoka tu, Bella aliingia kuoga vizuri, akapaka mafuta na kupulizia pafyumu aliyojua Masha huipenda, kisha akavaa lingerie. Kinguo cha ndani
cha kumtamanisha Masha. Huku akiumia sana moyoni, alimtumia ujumbe Elvin. “Naomba usije ukasahau hata siku moja kuwa nakupenda Elvin. Nakupenda kuliko nafsi yangu.”  Alitaka kuanza kulia lakini alijionya. Alitaka Masha akija amkute akiwa ametulia. Aliona kwenye kamera za getini, gari ya Masha ikiingia, akajua anarudishwa na dereva wake. Alishangaa kuona gari inasogezwa mpaka karibu na mlangoni kabisa na yule dereva anambeba Masha. Bella alivaa Robe{kanzu}, haraka haraka akatoka chumbani na kukimbilia nje. “Hali yake mbaya sana, na hataki kwenda hospitalini amesema nimlete hapa kwako.” Yule dereva aliongea mara Bella alipotoka. “Naomba umwingize chumbani kwake, na ikifika jioni, ukamchukue mtoto shuleni. Asante sana.” Bella aliwafuata nyuma, Masha akawekwa kitandani mwake, yule dereva akaondoka.

Bella alimpa dawa, akamvua nguo haraka haraka nakuanza kumkanda na kitaulo cha maji. Alipoona anaanza kutulia, alimgeuza vizuri, akaanza kumkanda mwili mzima taratibu kama anamfanyia masaji na kumpapasa kitu ambacho hakuwa amemfanyia muda mrefu sana. Bella aliendelea kumpapasa Masha kwa kuminya minya kwa nguvu kiasi, na kumbusu maeneo ya shingoni alipojua anachanganyikiwa haraka, huku akiwa nusu uchi. Kadiri mwili wake ulipokuwa ukigusana naye, aliona vile Masha anavyo vuta na kushusha pumzi taratibu. Akajua anajaribu kutoa zile hasira. “Pole, T.” Bella alimnong’oneza masikioni, Masha akapumua kwa nguvu bila kufungua macho wala kujibu. Bella akamuona anapitiwa na usingizi. Hakuondoka, akabaki amelala pale pale pembeni yake, karibu sana na mwili wake. Masha alifungua macho mara kadhaa kama kuthibitisha kama kweli ni Bella na bado yupo pale, kisha akalala na Bella akiwa vile vile nusu uchi.

Alilala kama masaa matatu hivi mfululizo, ndipo akashtuka. Bella alihisi Masha akimpapasa. Akashtuka. “Vipi unajisikiaje?” Bella aliongea naye kwa upole sana. “Nina hamu na wewe Bella.” Bila kujibu kitu, Bella alitoa lile shuka alilokuwa amejifunika naye, akavua kile kinguo, lingerie, na kubaki kama alivyozaliwa mbele ya Masha. Kama kawaida yake, Masha alifunga macho kwa sekunde kadhaa kama akivuta fikra, na kufungua akiwa amejawa tabasamu usoni. Bella alianza utundu wake kwa Masha, lakini Masha alishindwa kufanya mapenzi kabisa. Bella alihangaika naye pale kitandani, lakini Masha alishindwa. Taratibu aliona sura ya Masha ikibadilika na kupandisha hasira. Bella alijua kinachofuata ni Masha kutoka pale na kwenda kummaliza mkewe. Akaamua kumuwahi. Bella akajilaza pembeni yake huku akimbusu Masha, kana kwamba hakuna cha tofauti kilichotokea.

Bella ajisalimisha kwa Masha.
“Nina wazo T.” Bella alinong’ona. “Kwa kuwa hapa pameshachafuka na kukuharibu kichwa chako, kwa nini tusiondoke na watoto wetu tukaishi nchi nyingine?” Masha alishtuka sana, akamgeukia Bella. “Unasema?” “Kama ungependa lakini. Sio lazima. Ni wazo langu tu.” Bella alijibu na tabasamu usoni huku akibusu midomo ya Masha iliyokuwa imepinda. Bella alijua kuteka akili za Masha, na kufanya kiburi chote kiishe na kuwa kama mtoto mbele yake, hasa wakiwa kitandani. “Na Elvin?” “Nimekuchagua wewe T. Nataka kuwa na wewe na watoto wetu.” “Unauhakika? Sitaki uje kujuta au kubadilika.” Bella alimkumbatia Masha na kuendelea kumchezea, huku akimbusu. “Lakini mwenzio nimeishiwa nguvu, Bella. Utaishije na mimi?” “Maisha sio kufanya mapenzi tu Masha. Hata hivyo sasa hivi wewe ni mgonjwa. Naamini tukiondoka kwenye haya mazingira, tukaenda sehemu tulivu, na ukafuata ushauri wa madaktari, utapona tu. Usiwe na wasiwasi. Sijawahi kuona upendo kama huo wako T. Na ninauhakika sitakuja kupendwa kama unavyonipenda wewe. Heri nichukue mapema, nisijute baadaye.” Masha alifurahi sana. “Asante Bella kwa kunirudia. Sasa kama kuondoka, ulitaka tuondoke lini?” Masha aliuliza. “Hata kesho.” “Kweli Bella?” “Kweli.” Bella alijibu na busu juu. Masha aliomba aletewe simu yake. Akatuma ujumbe, kisha akazima simu yake kabisa na kubaki na Bella pale kitandani. Bella alikaa naye, mpaka akapitiwa na usingizi tena.

*******************************************************

Akatoka baada ya kusikia sauti ya mwanae Ric akimwita, baada yakurudishwa na dereva. Tito hakuwa na shida, ilimradi msafi na anamichezo yake kitandani kwake, hakuwa na shida kuachwa hapo hata masaa. Alienda kuandaa chakula cha usiku huku akimsaidia Ric kufanya kazi zake za shule wakati Tito akicheza. Ilipofika saa moja usiku alishangaa kumuona Masha anatoka chumbani akiwa anatembea na fimbo yake. “Naona usingizi umekusaidia.” Bella alimsogelea na kumbusu. “Wewe ndio umenisaidia Bella. Unajua umerudisha tumaini jipya maishani mwangu? Umenipa sababu ya kuishi.” Bella alitabasamu huku akiumia sana moyoni. Alimchukia Masha kwa roho yake ya ukatili na ubinafsi. Alitabasamu tena na kumbusu, kisha akelekea jikoni kuleta juisi.

Masha alikaa chini na kufungulia tv. Ric alimsogelea, akamsalimia na kumbusu baba yake. “Habari za shule?” Masha alimuuliza. “Nzuri.” Ric alijibu huku akijilaza miguuni kwa baba yake. “Anasinsia huyu. Ashakula?” Masha aliuliza. “Ameshakula. Bado kuoga.” Wakati wanaongea, wakasikia ‘Breaking news.’ Wote wakatulia. Ilitangazwa kupatikana kwa Mama Masha akiwa ametupwa kwenye mataa ya Mwenge kutokea Mbezi beach. Habari zilisema, hali ya mama huyo ni mbaya sana, lakini amekimbizwa hospitalini kwa matibabu.

Masha alisimama. “Unaenda wapi tena?” Bella aliuliza. “Si umesikia mke wangu amepatikana? Ndio naenda huko hospitalini.” Masha alijibu huku akitabasamu. Bella alimtizama kwa sekunde kadhaa, akaenda kumchukua Ric ili akamuogeshe. “Nitarudi baadaye kidogo. Ngoja nikaonyeshe sura yangu kwenye tv kidogo.” Masha akatoka. Bella alijua wazi ni mpango aliokuwa akifanya Masha mwenyewe wakati yuko huko chumbani kabla na baada ya kulala, kwa kuwa alitoka tu mlangoni na dereva wake akawa anaingia getini kuja kumchukua. Bella aliingia chumbani nakuanza kulia sana huku ameacha watoto wakimsubiri. Alilia kwa muda huku ameficha uso wake kwenye mto ili watoto wasimsikie. Alijutia wazo la siku ya kwanza kabisa kwenda kwa kina Zera kuomba msaada. Alijutia siku ile ya kwanza alipokubali kupanda gari ya Masha na kupelekwa hotelini akiwa na marehemu mdogo wake. Bella alilia, bila msaada. Alimlilia Elvin. Alililia mapenzi ya kweli anayoyaacha. Aliendelea kulia mpaka aliposikia mlango unagongwa.

“Mama!” Ric aliita kwa upole, Bella aliitika baada ya kutulia. “Nataka kulala.” Bado Ric alikuwa amesimama mlangoni kwa mama yake. Ilimbidi Bella kutoka na kwenda kuwaogesha watoto na kuwalaza. Alikuta ujumbe na simu kutoka kwa Elvin. Kwa yale aliyoyafanya kwa Masha, Bella aliogopa hata kuongea tena na Elvin. Alijiambia saa aliyomvulia nguo Masha, ndio mwisho wake yeye na Elvin. Swali atamalizaje mahusiano hayo bila kumuumiza Elvin, aliyekuwa anaandaa harusi yao ndilo lililokuwa likimliza Bella zaidi. Elvin alibadilika sana kwa furaha ya kumuoa Bella. ‘Masikini Vin wangu!’ Bella aliendelea kulia.

*******************************************************

Elvin alishatoa hata sadaka ya shukurani kwa Mungu kumjibu maombi yake. Kumpata Bella na watoto wawili aliokuwa akiwapenda sana, tena na baraka za Masha juu yake. Asijue mapito anayopitia mchumba wake. Elvin alishasajili ile kampuni ya utalii, aliyokuwa amepewa na Masha kama shukurani yakumuuguza wakati Matha na wanae wamemtelekeza. Na alishaanza kupokea wageni nchini kwa kutumia jina lake yeye, Mwasha Tourism’. Alikuwa akifanya kazi kwa bidii ili kumfanya Bella aendelee kuishi kwenye utajiri mkubwa hata mara baada ya kumuoa. Kwa msaada wa Masha na Bella, ni kweli mambo yalionekana yanamnyookea Elvin. Pesa ilikuwa ikiingia, mchumba mzuri aliyekuwa akitamaniwa na watu wengi, anaye yeye, na watoto wazuri wanao mpenda pia alikuwa nao. Alipoteza watoto wawili, Mungu akampa wengine wawili. Hapakuwa na jinsi ungemwambia Elvin kuwa hapa duniani hakuna Mungu akaamini. Hofu ya Mungu iliongezeka kwenye maisha yake. Alimcha Mungu sana. Hakuacha kumshukuru Mungu wake kila wakati. Aliweza kuwaingizia pesa wazazi wake, na bado yeye na Bella walijiingizia pesa kwa kampuni hiyo ya utalii.

*******************************************************

Wazo la kumdanganya Elvin lilimjia Bella. Akaamua kumpigia simu. “Vipi Vin?” “Safi. Vipi Masha?” “Hali yake sio nzuri. Haya matukio yanamuumiza sana. Leo amerudishwa nyumbani amebebwa na mlinzi wake.” “Daah! Kweli inasikitisha.” “Lakini ametoka tena kwenda hospitalini kumtizama mkewe. Nafikiria nimrudishe tena hospitalini, na pia itakuwa ni njia yakutoka hapa nchini. Huwezi jua huyo aliyewateka nyara familia yake, anapanga nini tena. Anaweza kumteka nyara Masha na sisi pia. Nahofia wasije kuwauwa wanangu Vin.” “Unamaanisha nini Bella?” “Ni kwa muda tu, Vin. Namrudisha Masha kwa daktari wake, akipona tu na nikiona hapa nchini pametulia na muhusika amekamatwa, nitarudi.” “Si unajua mambo ya harusi yamekaribia?” “Kwanza hata hujanivalisha pete ya uchumba.” “Acha haraka basi bibi harusi wangu! Mambo mazuri hayataki haraka.” Kidogo Elvin na Bella walicheka. “Sitakawia kurudi. Pakitulia hapa nchini na kama Masha bado mgonjwa, naweza nikamuacha hukohuko kwa kuwa kule wanamarafiki zao, mimi nikarudi tufunge ndoa kwanza, halafu tutajua baada ya hapo. Lakini hatuwezi kuwa na raha ya harusi yetu tukiwa na wasiwasi wakutekwa nyara, Vin. Inaonekana ni mtu anayelipa kisasi kwa Masha, na mimi ndio kama unavyojua. Wameshajua mimi ndio udhaifu wa Masha. Watanifanyia lolote ili kumuumiza Masha.” “Ni kweli. Lazima kuwa makini.” Elvin alishaingia kwenye uongo wa Bella na kuamini. “Unafikiri mtaondoka lini?” Elvin aliuliza. Sijajua. Lakini si utatufuata kama ukiona tunakawia kurudi?” Bella alimuuliza lakini alijua kabisa ana mdanganya. Hiyo ndio ilikuwa kuagana moja kwa moja. “Kabisa Bella. Siwezi kukuacha huko peke yako mpenzi. Lazima nitawafuata ili kama kuna msaada unahitaji niweze kukusaidia. Huwezi kuuguza na kulea ukiwa peke yako.” Bella alizidi kumuhurumia Elvin. “Asante Vin. Basi nitakujulisha mambo yanavyoendelea. Usije hapa nyumbani tena, wasije kuanza kukufuatilia na wewe.” “Sawa.” Elvin alikubali bila kufikiria. “Vin! Vin!” Bella aliita “Bado nipo Bella.” “Naomba usije kusahau kuwa nakupenda sana, kuliko nafsi yangu.” Elvin alicheka. “Tutaonana tena Bella, na utakuwa salama. Usiwe na wasiwasi, Mungu yupo na sisi. Nakuombea mpenzi wangu.” “Asante Vin.” Bella alikata simu na kubaki akilia. Alijilaumu kumdanganya Elvin, na alishaanza kuwa na hamu naye kabla hata hajaondoka nchini. Alilia na kulia bila kujua chakufanya.

*******************************************************

Elvin pekee ndiye mwanaume aliyemfanya Bella ajisikie ni Enabella. Aliamsha hisia kwa Bella ambazo hakuna mwanaume aliyefanikiwa. Kule kuguswa tu na Elvin, Bella alikuwa akisisimkwa mwili mzima. Elvin alijua kuongea na kumtuliza Bella. Mara ya kwanza kumbusu Bella, Bella alihisi kuna umeme unapita mwilini mwake, kitu kilichomuhakikishia kuwa kweli anampenda Elvin. Alishafanya mapenzi na Masha, lakini hakuwahi hata kupatwa na hisia zilizokuwa zikimpata kila anapoguswa na Elvin. Japokuwa Elvin hakuwahi kufanya naye mapenzi, lakini Bella aliisubiria hiyo siku kwa hamu kupita kitu chochote. Alikuwa akiiota siku yake ya harusi yeye na Elvin. Kila wakati alijifikiria pale anavyotamkwa yeye ni mke halali wa Elvin, vile watakavyopata muda mtulivu huko kwenye fungate akifaidi penzi la Elvin, aliyejua kuamsha hisia zake. Bella alikuwa akimtizama Elvin kwa uchu sana, huku akijivunia kwa Eli kuwa hajawahi ona mwanaume kama Elvin. Eli ndio alikuwa mnyonge wake na ndiye aliyekuwa akimpigia simu na kujivunia juu ya Elvin. Alimwambia Eli haoni kama wao wanaweza kumtafutia sehemu ya fungate nzuri itakayo mfaa Elvin, kwa kuwa hawatambui umuhimu wa Elvin kwenye maisha yake. Alimwambia yeye ndio anataka atafute sehemu ya kwenda kumpa pole Elvin ya kutoka kwenye ndoa mbaya na kuweka historia mpya ya penzi kwenye maisha yake. Bella alisubiri siku ya harusi kwa hamu sana na hakutaka kitu chochote kitokee kuzuia ndoa yao.  

*******************************************************

Akiwa anapitiwa na usingizi kitandani kwa Masha, alisikia mlio wa magari yakiingia getini. Bella alikimbia kuangalia camera kujua ni kina nani ili ampigie Masha simu. Alitulia akiwa amepigwa na mshangao baada ya kuona Masha akiingia na magari ya polisi. ‘Kama angekuwa amekamatwa, asingerudishwa hapa. Angekuwa jela. Nini kinaendelea?’ Bella aliwaza, akaamua kubadili nguo ili atoke. Alimkuta Masha na baadhi ya mapolisi nje ya mlango. “Kuna nini Masha?” “Hali yetu ya kiusalama sio nzuri kabisa. Nimeomba ulinzi mpaka kesho tutakapoondoka hapa nchini.” Bella alimtizama Masha, kisha akaingia ndani.

“Kesho tunaondoka Bella.” Masha alimfuata Bella ndani. “Sawa.” Bella alijibu bila kumtizama Masha huku akiendelea kutembea kuelekea chumbani kwa Masha. “Unauhakika? Hamna kurudi tena nyuma.” “Nimesema sawa Masha.” “Kwa nini huniangalii sasa?” Bella aligeuka. “Kama hutaki kuondoka na mimi na watoto, wewe baki na Elvin wako. Lakini..” Masha alianza kugomba. “Kwa nini unataka kuanza kujikasirisha Masha? Nimekwambia sawa.” “Mbona ulikuwa huniangalii sasa?” “Naomba uangalie saa yako, T. Sasa hivi ni usiku sana. Nina usingizi watokea jana. Nakuwa silali sababu ya kukuhofia wewe. Sasa umerudi, naomba mimi nikalale.” “Usiwe na wasiwasi Bella. Tunaenda kuanza maisha yetu, ya amani na utulivu. Mimi, wewe na watoto wetu.” Bella alitabasamu akageuka. “Usilale Bella. Nisubiri. Nataka kuwaaga hawa askari.” “Sawa.” Bella aliingia chumbani kwa Masha na kujitupa kitandani.

*******************************************************

Baada ya muda Masha aliingia. “Mama Masha anaendeleaje?” Bella aliuliza. “Wewe ndio Mama Masha.” Bella alinyamaza. Masha alivua nguo na kumtaka Bella waende naye bafuni. Bella alijua kazi yake ndiyo imeanza rasmi. Alitoa tabasamu kama kawaida yake, akaenda kumalizia kumvua nguo Masha, nakumvutia bafuni. “Nimehakikisha anasaini karatasi za talaka kabla sijamkata mkono wake wakulia. Hakuwa akitaka kuweka saini, tokea mwezi uliopita.” Masha aliongea kana kwamba ni kitu cha kawaida sana, wakati Bella anaendelea kumsugua mgongoni taratibu ndani ya sinki walilokuwa wamejaza maji ya vuguvugu. “Akija kukutaja kwa polisi?” Bella aliuliza. “Hawezi.” Masha alijibu kwa uhakika. “Kweli nimemlipa kisasi.” Masha alitabasamu. “Sasa hivi nimemsamehe yeye na wanae. Nilienda hospitalini kumuaga rasmi. Nimemwambia sasa hivi ndio nimemsamehe, na tunaachana rasmi. Kama akifanikiwa kutoka pale hospitalini, mali zote nilizomwachia zitamsadia kumtunza. Kwa kuwa najua hatakuwa na uwezo wa kufanya kazi wala kutongozwa.” “Kwa nini?” Bella aliuliza akiwa na hofu kubwa sana. “Nimemuharibu kupita kiasi. Hasira zote za kumtoa kijijini na kumleta mjini kisha akanisaliti, akasababisha niwe nakupiga wewe kupunguza uchungu wa mabaya alionifanyia yeye, walivyokufukuza na watoto wangu usiku wa manane, kunitesa nikiwa mgonjwa, tena kwa ugonjwa alionisababishia yeye na wanae, kunipokonya mali zangu nilizotafuta kwa jasho langu na mambo mengine mengi aliyowahi kunitendea, yaliibua uchungu mkubwa sana. Afadhali Junior nilikuwa natoa amri aadhibiwe. Ila yeye, nilimuadhibu kwa mikono yangu mwenyewe. Hakika nimemuadhibu Matha. Kama hatakufa pale hospitalini, akatoka, hatakaa aone jua tena maishani, hatakaa aguse kitu tena, wala hataongea milele. Niliacha masikio ili asikie kila kitu kinachoendelea duniani, na ajue hatakaa avipate tena. Nilimkata kuanzia mabegani, kuhakikisha hamna daktari hapa duniani anaweza kumuunga tena mikono hata ya plastiki.” Masha alicheka.

“Niliwaomba wale walinzi wake nimkumbatie mke wangu, kumbe nilikuwa nikimnong’oneza huku nikimcheka. Nilimkumbusha kuwa alinikuta mjini na pesa, na ameniacha nazo. Nilihakikisha ananisikia, na yale maneno yanamwingia akilini na moyoni. Nilimkumbusha jinsi nilivyomwambia tokea zamani kuwa anaanza vita ya hatari sana na mimi, hakuna mwanaume atakayeweza kumficha pindi nitakapojibu mashambulizi. Hakunisikiliza. Mimi ndiye niliyemtoa mavumbini na kumketisha na wakuu, lakini alilisahau hilo akaweka jeuri kwa sababu ya wanaume aliokutana nao hapa mjini, tena wanaongia madarakani kwa kupitia kampeni wanazofanya kwa pesa zetu. Nilikuwa nikimng’oa meno huku nikimkumbusha kuwa nilimtoa chini na kumpandisha juu, na nikamuaga kwa kumwambia nimehakikisha nimemrudisha nilipomtoa. Chini kabisa. Unajua anatakiwa akushukuru sana wewe?” Bella alikuwa akitetemeka sana. Maji yalikuwa yanavuguvugu, lakini alijihisi ni kama amekaa ndani ya maji yaliyojazwa barafu “Nilikuwa ninamkata kila kiungo, taratibu, tena bila ganzi. Angeteseka sana bila wewe kumfupishia mateso yake. Nili..” “Naomba unyamaze Masha. Unaniumiza tu moyo wangu. Nyamaza.” Bella alisimama ili atoke kwenye maji.

Masha alimgeukia Bella akiwa amebeba ile sura yake ya kikatili. “Usiniache humu ndani ya maji, Bella.” Bella alirudi kukaa taratibu. Alijua ameshapandisha hasira. Kile kicheko alichokuwa akikicheka wakati anasimulia, alijua ni cha uchungu. Masha alimpenda sana mkewe. “Najua una uchungu Masha. Naomba utulie. Hatuwezi kusafiri ukiwa mgonjwa. Naomba tukalale, tuache mazungumzo yatakayo kupandishia hasira.” Masha alitoka, akajikausha na kurudi chumbani. Bella alisimama kwenye bomba akawa anajisuuza sabuni huku akilia sana. Alitoka na kumkuta Masha amekaa kitandani akimsubiria.

*******************************************************

“Vipi T?” Bella alipanda kitandani, akakaa pembeni ya Masha. “Kitu ninachotaka kufanya kesho ninafanya kwa kuwa wewe ndiye umesema. Nimejijenga sana hapa nchini. Unataka tuhamie nchi ya ugenini ili tukaanze maisha mapya mimi na wewe. Nimeipata talaka yangu kwa kumwaga damu, ili niwe na wewe.” Bella alianza kuogopa. “Nakupa nafasi moja na ya mwisho, kunihakikishia. Ni kweli umeamua kuwa na mimi? Na ninakuomba Bella, uwe na uhakika, maana tutakapo panda ndege kuondoka hapa nchini, ujue ndio mwisho wako wewe na Elvin. Sitaruhusu mawasiliano naye kwa namna yeyote ile. Ni mimi na wewe tu. Tunaanza ukurasa mpya na watoto wetu. Hutarudi tena Tanzania.” Bella alivuta pumzi kwa nguvu na kumeza mate. “Na ukisema ndiyo leo, ujue hakuna kurudi nyuma, na hutakaa ukanisaliti. Nitamuadhibu yeyote atakayekusogelea kwa namna yeyote ile. Nilikuapia mimi na wewe mpaka kifo. Unakumbuka?” Bella alibaki kimya. “Nataka unijibu Bella.” “Mimi na wewe mpaka kifo ndio kitatutenganisha, T.” Masha alivuta pumzi kwa nguvu, akafunga macho yake. Bella alijua wazi ni nini kitakachofuata. Aliandaa akili zake.

Masha alianza kumparamia Bella akitaka kufanya naye mapenzi. Kama kawaida yake, Bella alijituma kumridhisha, lakini Masha alishindwa kabisa. Bella alihangaika naye sana, lakini ikashindikana. Shindikizo la damu alilokuwa amelipata lilimsababishia kupoteza nguvu za kiume. “Pole T, utapona. Usiwe na wasiwasi.” Masha alitoka pale kitandani kwa hasira bila kujibu. Bella akafikiria kwa haraka, akamuwahi kwa maneno aliyojua yatamtuliza kabla hajatoka mle ndani na kwenda kusabisha maafa kwa mtu mwingine. “Naomba usichelewe kurudi, nataka kulala kifuani kwako. Ninahamu na wewe Masha. Sijalala mikononi mwako kwa muda mrefu sana.” Bella aliongea kwa kutulia na kumfanya Masha asimame pale kwa muda. Alitaka kuvaa nguo zake atoke. Akajizungusha kidogo pale chumbani akarudi kitandani na kujiegemeza kwenye mto, Bella akajisogeza mpaka kifuani kwake, Masha akamkumbatia.

*******************************************************

Wakati akiendelea kumpapasa taratibu huku ametulia kifuani kwake, Bella aliendelea kutafuta na kupanga maneno yakumwambia ili asiharibu na kuamsha hasira za Masha na kafara yake isiwe bure. “Lazima nihakikishe madhumuni yangu yanakamilika kwa hakika. Na lazima anithibitishie. Siwezi kupoteza kila kitu, bure.” Bella aliwaza. Akanyanyua uso kwa lengo la kuongea, macho yao yakagongana, akaogopa. Akampa tabasamu, na kuinama kwa haraka na kuanza kumbusu midomo yake iliyopinda. Alijikuta akiendelea kumbusu kwa muda mrefu huku akikusanya nguvu ya kuongea naye bila ugomvi. Alijua Masha anafurahia kwa jinsi alivyotulia. Masha alishamlalamikia kuwa  anamuonea kinyaa midomo yake kwa kuwa imepinda. Kwa hiyo Bella naye aliinyonya kwa zamu, juu na chini kama kitu kizuri chenye ladha tamu ambayo ni ngumu kuachia, huku akitoa migugumo ya mahaba, na akijisukumia kwa Masha zaidi. Masha aliendelea kufurahia. 

 Baada ya muda, Bella alimuachia, akabaki vile vile karibu yake wakitizamana, akaanza kupitisha kidole chake kwenye midomo ya Masha taratibu, kuhu akilamba ya kwake kwa utulivu. “Asante Bella. Nimefurahia sana. Nimejisikia vizuri. Nahisi nimerudisha uzima wote mwilini kwangu. Umenifanya nijisikie vizuri sana. Nikama ulikuwa ukinyonya huzuni, majonzi na maradhi yangu yote yaliyokuwa yamelemea mwili wangu. Nilikuwa nakaribia kuchanganyikiwa. Asante sana.” Bella alitabasamu, akajua huo ndio wakati wakuongea chochote na kusikilizwa. “Nimefurahi kama umefurahia. Lakini naomba uniahidi kitu kimoja Masha.” “Unataka nini?” “Nataka unihakikishie na uniahidi hapa leo, hutawahi kumgusa Elvin, hata iweje.” Masha alinyamaza, ndipo alipohakikisha hasira ya Masha kwa Elvin. “Nakuahidi, sitakusaliti Masha. Naomba na wewe uniahidi hutamgusa Elvin wala familia yake.” “Unajua ile familia wote ni wasaliti sana? Nilipowaita siku ile ofisini kwangu, niliwaeleza mkasa wote na kuwaambia kuna watu waliokodishwa na Junior,  wapo nje ya geti wanataka kukuingilia wakudhuru. Wakanishauri, tena Mzee Mwasha mwenyewe akiwa na familia yake, eti nikuache kwa muda, mambo yakitulia nitakukuta tu. Halafu walivyo washenzi, mambo yametulia eti ndio wanakuja kulipana mahari yako, tena ya kimaksini, mbele ya macho yangu. Yaani wanagawana mke wangu, mbele ya macho yangu! Unafikiri ni adhabu gani inawastahili wasaliti kama wale kama sio kifo?” Bella alikaa kwa haraka sana. “Nisikilize Masha. Nataka hayo mambo ya kulipiza kisasi yaishe. Wewe shida yako ni mimi, nimekubali kuwa na wewe, sasa nikisikia chochote kimemtokea Elvin na familia yake, nakuapia Masha, sitakaa nikusamehe maisha yangu yote. Huo ndio utakuwa mwisho wangu mimi na wewe. Hutakaa unione tena, isipokuwa maiti yangu.” Masha alinyamaza. Angepoteza kila kitu duniani lakini sio Bella. Bella ndiye ndugu wa mwisho aliyebaki naye na alijiambia Bella ndiye atakaye mzika.

“Masha!” Bella alimwangalia kwa ukali, na ndipo alipojua alishaweka tayari mpango wakumdhuru Elvin na familia yake. “Maadamu na yeye hatagusa vya kwangu na mimi sitamgusa.” “Haya. Sasa hivi naomba wapigie simu vijana wako, waambie wasimsogelee mtu hata mmoja kwenye familia ya Mwasha.” “Nitafanya kwa wakati wangu.” “Hapana Masha. Sasa hivi huna chako wala mimi sina changu tena. Wewe ndio mimi, na mimi ndio wewe. Muda wote tuliobakiza hapa duniani ni wetu mimi na wewe mpaka kifo. Piga simu, sasa hivi kabla sijaondoka hapa chumbani. Na nikiondoka tu, sitakaa nirudi tena maishani mwako.” Masha alimuona vile Bella alivyombadilikia. Akachukua simu yake akapiga. Iliita mara moja tu, ikapokelewa. “Usifanye chochote tena. Iwe mwisho. Kazi imeshakwisha.” “Nilishatuma vijana kwa ajili yakumalizia kazi, hiyo siku ya kesho.” “Waambie basi. Walipe kwa ajili ya hiyo kazi ya kesho na uwaambie wasifanye kitu chochote tena.” Bella alibaki akimtizama Masha huku machozi yakimtoka. “Masha wewe jamani!” Bella aliingiwa na hofu kupita kiasi, alibaki ameduwaa, asiamini kwamba siku ya kesho yake ndio ulikuwa mwisho wa maisha ya familia hiyo ya Mwasha. Masha alicheka. “Lakini wao nisingewatesa.” Bella alijivuta pembeni yake, wala hakurudi tena kifuani kwa Masha. “Nitafanya kila niwezalo kuwa na wewe Bella, nikishindwa ni heri nife.” Bella hakutaka kumjibu Masha, alilala tu.

*******************************************************

Palipambazuka, Bella akaanza kazi ya kufungasha. Alifungia vitu vya marehemu mdogo wake kwenye chumba kimoja cha nje, na kumuachia maagizo dereva wa Masha, kuwa hata atakapokodisha ile nyumba, awaambie wapangaji wasikifungue kile chumba. Aliacha vitu vingi vya kumbukumbu yake na Elvin mle ndani, akakifunga kile chumba. Baada ya muda, Masha alirudi na ticketi. “Tunaondoka leo usiku.” Masha aliingia chumbani na kumkuta Bella bado anafungasha. “Uliondoka na simu yangu?” Bella aliuliza swali bila kuchangia chochote. “Ndiyo. Kwani unahitaji ya nini?” “Nataka kumuaga Elvin na Mzee Mwasha.” “Usinikasirishe Bella. Uliniahidi nini jana usiku, au ulifikiri nakutania? Ushaingia agano na mimi, hakuna kurudi nyuma tena. Nimekwambia tunaondoka usiku. Umenisikia?” “Naomba uache kugomba Masha. Utaogopesha watoto. Kwa nini unashindwa kuongea kawaida tu? Ni nini hapa cha kukuudhi?” “Kwa nini unamtaja tena Elvin?” “Nimekuomba nimuage. Kama hutaki, si unasema tu. Kwa nini unakasirika bila sababu?” Masha alitoa ile simu ya Bella na kuanza kuivunja vunja pale mbele ya Bella kwa kuikanyaga kanyaga baada ya kuitenganisha, kisha akaokota kwa shida na kuitupia ukutani. Bella alibaki akimtizama.

“Hakuna mawasiliano na mtu yeyote. Unataka aje hapa ili wanangu wamlilie?” “Naomba ukae chini Masha. Kaa hapa.” Bella alikaa kwenye kitanda. “Wewe uongea tu.” “Hapana Masha, nataka ukae chini.” Masha alijivuta mpaka kwenye kochi akakaa. “Nimekwambia kitandani, Masha. Acha ubishi.” “Hapa pia nakusikia.” “Nataka ukae hapa karibu yangu. Mbona unaleta ubishi usio na maana Masha? Umetembea mpaka hapo kwenye kochi badala yakuja hapa kitandani! Sasa yote hayo unafanya kwa nini?” “Wewe ndiye unazidi kunichanganya.” “Nakuchanganya na nini wakati sasa hivi mimi ni wako?” Masha alitulia kidogo, akasimama na kuhamia kitandani. “Nini?” “Unakumbuka aina ya maisha tuliyokuwa tukiishi wakati ni mjamzito wa Tito?” “Nakumbuka.” “Unajua yale maisha ndiyo yalinifanya nikaja kukufuata mpaka kwa mkeo, nikakuuguza? Najua sasa hivi mambo yamebadilika. Unaumwa. Lakini naomba turudie yale maisha T. Tunakwenda ugenini, halafu tunakuwa hatuelewani! Unafikiri hawa watoto watakimbilia wapi? Nimekuchagua wewe ili tulee watoto wetu kwa upendo na furaha.” “Furaha itatoka wapi kama nashindwa kuwa mwanaume kitandani?” “Uanaume wako haupo kitandani peke yake Masha. Nakuhitaji kwenye maisha yakawaida pia. Na mimi pia nimeacha maisha yangu hapa Tanzania, nimekubali kuambatana na wewe, basi hata hilo tu, naomba uliheshimu.” “Nitajitahidi Bella. Japo..” Masha alisita . “Kuna nini, T?” “Nakosa ujasiri mbele yako Bella.” “Masha jamani! Na watoto wawili hao tulionao?” “Talaka nimeihangaikia ya bure kabisa.” “Kwa nini unasema hivyo?” “Nilitaka nikuoe mimi.” “Sasa kinachokufanya usinioe tena ni nini?” “Acha kunikashifu Bella.” “Tatizo lako unaharaka Masha. Unataka mambo yote yatokee kwa wakati mmoja. Acha tumalize hili lakuhama kwanza, kisha tuhamie kwenye matibabu, halafu mengine yafuate.” “Kwa hiyo huwezi kuolewa na mimi mpaka nipone?” “Ni wewe tu na juhudi zako.” Bella alishamshika na kuanza kumbusu. Masha alifurahi sana. Bella aliendelea kumbusu pale kitandani mpaka Ric alipoingia kuulizia kama afungashe na madaftari yake. Masha na Bella walishtuka wakati mlango unafunguliwa, wakakaa huku Bella akivuta nguo yake vizuri, kujisitiri. “Fungasha tu Ric.” Bella alijibu huku akijiweka sawa. Ric alitoka na kuwaacha wazazi wake. Masha na Bella wakaanza kucheka kwa sauti ya chini.

************************************************************

*Mapenzi ya dhati kwa Elvin yamesababisha Bella kukusudia kujitoa muhanga ili kumnusuru mpenzi wake na familia yake. Amekusudia kujirudi kwa Masha, na kumtoa kabisa  nchini kuokoa maisha ya familia nzima ya Mwasha ambayo Masha alishaweka mpango wa kuwaangamiza.

*Elvin alishatoa mpaka sadaka ya shukurani kwa Mungu, kwa kumpa Bella. Maandalizi ya harusi yamefika ukingoni. Kaka hao watatu wamekusudia kumwandalia Elvin na Enabella, harusi ya kuweka historia. Walichangishana wao wenyewe na marafiki zao wakaribu sana ili kuhakikisha Bella, binti aliyezungukwa na mapesa ya Masha, anapata harusi ya kusimuliwa jijini.

-Je, Nini kitaendelea?
-Je, Bella atafanikiwa kumtoa Masha nchini bila ya kulipiza kisasi kwa Familia hiyo ya Mwasha aliyoona ni wasaliti, haswa Elvin ambaye Bella ameshindwa kuficha kisia zake kwake?
-Je, ni harusi ipi itafungwa? Enabella na Elvin au ya Bella na Masha?


Usikose Sehemu ya 36. Na Pata Kisa kizima kwa kubonyeza link hiyo hapo chini, ya Hadithi hii  ya 
*My Past*
https://www.youtube.com/watch?v=dB1QTLtfmos&t=7sya